Nigeriya termasi ustozi raqibni sehr qilishda aybladi. Jamoa penaltilar seriyasida Kongo DRga yutqazib qo'ydi va endi JCH-2026ga bormaydi

Qatorasiga ikkinchi marta mundial armon bo'lmoqda

Nigeriya terma jamoasi bosh murabbiyi Erik Shell shogirdlari penaltilar seriyasida (3:4) imkoniyatni boy berib, JCH-2026ga chiqish imkoniyatini to'liq yo'qotgach, Kongo DR terma jamoasi azolarini sehr qilishda aybladi.

O'zi nima bo'ldi?

Mutaxassis pley-off finalida jamoasining mag'lubiyatini qabul qilishi oson bo'lmadi va barcha aybni g'ayritabiiy kuchlarga yuklab qo'ya qoldi.

"ESPN"ning xabariga ko'ra, hal qiluvchi penaltilar seriyasi vaqtida raqib futbolchilari taqiqlangan usullardan foydalandi, deydi Shell.

"Barcha penaltilar vaqtida kongolik bir yigit sehrgarlik bilan mashg'ul edi. Har safar... Har bir zarba vaqtida! Shu sababli men qattiq asabiylashdim", — dedi murabbiy.

Nigeriyaliklar uchinchi daqiqadayoq hisobni ochishdi — yarim himoyachi Frenk Oneka jamoasini oldinga olib chiqdi. Biroq yarim soat o'tar-o'tmas Elia Meshak muvozanatni tikladi. Asosiy vaqtning qolgan qismida jamoalar g'olib nomini aniqlay olishmadi va ish penaltilar seriyasigacha etib bordi. Futbol lotereyasida esa Kongo DR jamoasiga omad kulib boqdi (4:3). Seriyada ham barchasi murosasiz ruhda kechdi — har ikki golkiper ikkitadan zarbani qaytarishga muvaffaq bo'ldi.

Jurnalistlarning Shelldan vaziyatni batafsilroq aytib berish borasidagi so'roviga murabbiy qo'l harakatlarinigina keltirdi. "Sehr" aynan nimadaligini murabbiy izohlab bera olmadi. "Qandaydir shunaqa harakat (qo'l yordamidagi harakatlar. — tahririyat). Bilmasam, balki u suv yoki boshqa nimanidir sochgandir", — qo'shimcha qildi mutaxassis.

Keyinroq mikst-zonada Shell aniqlik kiritdi: gap vudu rituallari haqida ketmoqda.

Nigeriya anchayin kuchli tarkibiga qaramay, qatorasiga ikkinchi marta mundialni o'tkazib yubordi. Hozirgi jamoada misol uchun: Viktor Osimxen, Ademola Lukman, Vilfred Ndidi va Aleks Ivobi kabi nomlar bor.

Kongo futbolchilari million dollar uchun kurashadi

Sehr yordamidami yoki yo'q, ammo Kongo DR termasining chindan omadi kelmoqda — Nigeriyaga qarshi o'yindan avval, yarim finalda, ular Kamerunni 90+2-daqiqadagi gol evaziga taslim etishgandi.

Kongo DR kurashni davom ettiradi va endi qitalararo saralash o'yinida maydonga tushadi. Agarda "sehrgarlar" jamoasi g'alaba qozona olsa, 1974 yildan buyon ilk marta jahon chempionatida ishtirok etadi.

Stimul ancha katta — mamlakat futbol federaciyasi musobaqaning final qismiga yo'llanma qo'lga kiritilsa, har bir futbolchiga 1 million dollardan mukofot puli vada qilgan.

Nigeriyaliklar norozilik namoyishi sifatida mashg'ulotlarda qatnashmagan

Nigeriiyada esa motivaciya borasida ishlar aksincha. Avvalroq, saralash bahslari boshlanishidan ikki kun avval futbolchilar noroziliklarini namoyish etish maqsadida mashg'ulotda qatnashmagani aytilgandi.

"Butun tarkib, jumladan, rasmiy shahslar, to'lovlardagi kechikishlar tufayli bugungi mashg'ulotda ishtirok etmaslikka qaror qilishdi", — deya xabar bergandi "Blueprint.ng".