Navoiylik muxlislar Muborakka tashrif buyurishadi

To'qqizinchi turda Buxoroda “Buxoro” - “Qizilqum” uchrashuvini konchilarning olti yuz nafardan ziyod ishqibozi stadionning o'zidan turib tomosha qilishgandi.

Navoiyliklarning o'z suyuklilarini stadionning o'zidan turib faol qo'llab-quvvatlaganliklari  “Qizilqum” jamoasiga ruhiy dalda bo'ldi. Konchilarning uchrashuvning 3-daqiqasida o'z darvozalari to'ridan to'p olib chiqqan bo'lsalar-da, 70 va 90+2-daqiqalarda mezbonlar darvozasini ishg'ol etib uyga muhim g'alaba bilan qaytishdi.

“Qizilqum” ishqibozlar klubi navbatdagi turda ham o'z ananalariga sodiq qolishadi. 23 may kuni 10-tur doirasida Muborakda bo'ladigan “Mashal” - “Qizilqum” jamoalari bahsida ham navoiylik muxlislar konchilarni stadionning o'zidan turib qo'llab-quvvatlashga ahd qilishgan.

“Qizilqum” PFK rahbariyati o'z muxlislari tashabbusiga xayrixoh bo'lgan holda ishqibozlar uchun etarli shart-sharoit yaratib berishga harakat qiladi. Muborakda o'tadigan navbatdagi uchrashuvga Navoiydan besh yuz nafarga yaqin muxlis tashrif buyurishi rejalashtirilmoqda. SHu bois, o'yin oldidan maxsus avtobuslar qatnovi yo'lga qo'yiladi.

Muxlislar Navoiy shahridagi “So'g'diyona” stadioni oldida jam bo'lishadi. Avtobuslar 23 may kuni soat 12.00 da Muborak tomon yo'lga tushadi. Qulaylik yaratish maqsadida avtobuslar ishqibozlarni safarga olib borib kelishi tekin tashkil etiladi.

Murojaat uchun telefon -+998913333773, “Qizilqum” fan-klubi etakchisi SHahriddin Ishnazarov.

O'zlaringizni qiziqtirgan savollar bilan mazkur telefonga har kuni soat 9.00 dan 18.00 gacha qo'ng'iroq qilishingiz mumkin.