"Navbahor": Yangi futbolchilar tanishtirildi

Jamoa azolari ikkinchi davraga tayyorgarlikni Toshkentda olib borishgani va dastlabki ikki o'yin safarda o'tkazilganligi sababli, tanishtiruv marosimi ikkinchi davra arafasida o'tkazishni imkoni yuzaga kelmagandi. Taqdimot marosimida klub prezidenti T.Dadabaev, “Navbahor” futbol klubi vice-prezidenti R.Nizambaev, klub direktori G'.Ismailov, jamoa bosh murabbiyi Baxtiyor Ashurmatov, jamoa futbolchilari A.Ortiqov, Q.Mahammadjanov, A.Rahmatullaev, D.Isoqov, jamoa muxlislari va OAV vakillari ishtirok etishdi.

Davralar oralig'ida jamoa tarkibida u qadar katta o'zgarishlar ro'y bermaganligini aytib o'tish joiz. Xabaringiz bo'lsa, dastlabki davradan keyin jamoada to'p surgan xorijlik futbolchilar bilan do'stona ruhda xayrlashildi. SHuningdek, jamoamizdan ketishni istagan futbolchilarga ham javob berildi. Umumiy hisobda asosiy tarkibning olti nafar futbolchisi Navbahordan ketdi. Ularning o'rnini esa imkon qadar mahalliy futbolchilar hisobiga to'ldirishga harakat qilindi. Xususan, birinchi liga vakili Xotira-79 jamoasiga ijaraga berilgan Botir To'raboev, G'ayrat Jo'raevlar Navbahorga qaytarildi. Bundan tashqari Qo'qon-1912 klubiga ijaraga berilgan Qahramon Mahammadjonov ham ortga qaytdi. Olmaliqdan mahalliy darvozabon Akmal Ortiqovni jalb etgan bo'lsak, Kosonsoy jamoasi safida to'purarlik mahoratini namoyish etgan hujumchi Davron Isoqovni ham tarkibimizga qo'shib oldik. Buxorodan esa mahoratli yarim himoyachi Alibobo Rahmatullaevni chaqirildi.

Birinchi davrada jamoamizga yordam bera olmagan himoyachi Tohir SHamsitdinovga qo'llangan jazoni ham engilashtirishga muvaffaq bo'ldik. O'FF rahbariyatiga yuborgan iltimosnomamiz qondirilib, Tohirni maydonga tushishiga ruxsat berishdi. Jarohat olgan Rahmatillo Berdimurodov ham jarohatdan qutulib safga qaytdi. Murabbiylar shtabiga esa mamlakatimizning tajribali mutaxassislaridan biri Aleksandr Volkov taklif etildi. Ushbu murabbiyni jamoamizda bo'lishi ham ikkinchi davradagi natijalarni ijobiy ko'rinish olishiga zamin yaratadi degan umiddamiz.

Taqdimot marosimi davomida futbolchilarga “Navbahor” liboslari tantanali ravishda topshirildi. Xususan darvozabon Akmal Ortiqovga 87-raqamli, himoyachi Qahramon Mahammadjonovga 26-raqamli, yarim himoyachi Alibobo Rahmatullaevga 70-raqamli, hujumchi Davron Isoqovga esa 18-raqamli futbolkalar topshirildi. Botir To'raboev va G'ayrat Jo'raevlar mavsum boshida jamoa safida bo'lganliklari uchun marosimda ishtirok etishmadi. SHundan so'ng, har to'rt nafar futbolchi maydonga chiqib, o'yingohga yig'ilganlarga to'p bilan ishlash borasidagi mahoratlarini namoyish etishdi.
Marosim yakunida o'yingohga yig'ilgan muxlislar jamoa bosh murabbiyi Baxtiyor Ashurmatovga murojaat qilib o'zlarini qiziqtirgan savollariga javob olishdi. SHundan so'ng, muxlislar jamoaning navbatdagi mashg'ulotini tomosha qilish imkoniga ega bo'lishdi.