"Navbahor" - "Buxoro" uchrashuvidan keyingi fikrlar

Dastlab savollarimizga buxoroliklar ustozi javob qaytardi.

Tachmurod Agamurodov (Buxoro jamoasi bosh murabbiyi): - Bugun muxlislar sermahsul o'yinga guvoh bo'lishdi. SHu bilan birgalikda keskinlik ham yuqori notada bo'ldi. Keskinlik esa so'nggi soniyalargacha saqlanib turganligini ham etirof etish joiz. Tushunarsiz tarzda o'tkazib yuborilgan gol futbolchilarimizning ruhiyatiga tasir ko'rsatdi. Hozir ushbu vaziyatda kim haq yoki nohaq edi deb muhokama qilmoqchi emasman. Futbolchilarimiz oxirigacha xushyor holda o'ynashlari, raqib futbolchilari esa halol o'yin ko'rsatishlari kerak edi. Albatta g'alaba qozonganimizdan xursandman. Jamoamiz uchun uch ochko juda muhim edi. Yigitlar uchrashuvga jiddiy tarzda shaylanganliklarini ko'rsatishdi. Tartibli o'yin va o'z imkoniyatlaridan to'liq tarzda foydalanishlari samarasi o'laroq g'alabani tantana qildik.  

Mustafo Bayramov (“Navbahor jamoasi bosh murabbiyi): - Nima ham deya olardim. Muhim bo'lgan uchrashuvda imkoniyatni boy berdik. Himoyadagi qo'pol xatolar va darvozabonni ishonchni oqlay olmasligi mag'lubiyatga sabab bo'ldi. Hujumchilarimiz ikki bor hisobni tenglashtirishgan bo'lsada, yakunda so'nggi chiziqdagi xatolar imkoniyatni boy berishimizga sabab bo'ldi. Buxoro yaxshi shakllangan jamoa hisoblanadi. Mehmonlar tezkorlik borasida yuksak o'yin ko'rsatishmasada, imkoniyatlardan samarali foydalanib, g'alabaga erishishdi. Bizda esa buni aksi bo'ldi. Birgina Lupashkoni o'zi bir necha bor gol urishi mumkin edi. Ikkinchi bo'limda ustunlikka erishsakda, raqib darvozasiga kerakli gollarni ura olmadik.