"Nasaf" Turkiyadagi so'nggi nazorat o'yinida durang qayd etdi

Ro'ziqul Berdiev boshchiligidagi "Nasaf" jamoasi Moldova chempionatining 5-o'rinda ketayotgan "Tiraspol" bilan o'yinda durang qayd etishdi. Uchrashuvda har ikkala jamoa raqib darvozasiga to'p kirita olmadi va natijada ushbu bellashuvda g'olib nomi aniqlanmay qoldi.

Ushbu o'yin "ajdarlar"ning Turkiyada tashkil etilgan yig'in doirasidagi so'nggi uchrashuvi bo'ldi. SHu bilan Ro'ziqul Berdiev boshchiligidagi jamoa Antaliyadagi o'quv-yig'in mashg'ulotlarini yakunladi.

Antaliyada qarshiliklar jami ettita nazorat o'yinlarini o'tkazishdi.

SHularning 3 tasida qarshiliklar g'alaba qozongan bo'lsa, 2 ta durang va yana shuncha bellashuvda mag'lubiyatga uchrashdi. "Nasaf" - "Vion" (Slovakiya) 1:0, "Nasaf" - "Dinamo" (Gruziya) 0:1, "Nasaf" - "Korona" (Polsha) 2:0, "Nasaf" - "Gurnik" (Polsha) 1:0, "Nasaf" - "Ilichevec" (Ukraina) 0:1, "Nasaf" - "SHiroq" (Armaniston) 0:0, "Nasaf" - "Tiraspol" (Moldova) 0:0.

To'plar nisbati: 4:2. Gollarni Artur Gevorkyan (2 ta) va Ilhom SHomurodov (2 ta) kiritishdi. "Nasaf" safiga yangi kelib qo'shilgan ukrainalik legioner hujumchi Oleksandr Koblash ettita o'yinda birorta ham to'p kirita olmagani etiborga molik. 

Eslatib o'tamiz, Qarshining "Nasaf" jamoasi yangi mavsumdagi o'zining ilk rasmiy o'yinini Qarshida 25 fevral kuni OCHL doirasida Eronning "Traktorsozi" jamoasiga qarshi o'tkazadi.