Muxtor Qurbonov: “G'alabaga bunchalik oson erishishimizni kutmagandim”

O'yin yakunida matbuot hizmati vakillari bilan o'tkaziladigan ananaviy suhbat davomida “Oq bo'rilar” bosh murabbiyi Muhtor Qurbonov ushbu uchrashuv taasurotlari bilan bo'lishdi.

Barchaga ayon “Neftchi” turnir jadvalida 3-o'rinda ketayotgan jamoa. SHu sababli o'yin ancha qiyin kechadi deb kutgandik. Birinchi davraning ohirida yomon natijalarni qayd etganligimiz sababli, davralar oralig'idagi 20 kunlik tanaffusda o'z ustimizda jiddiy ishlashga, puxta tayyorgarlik ko'rishga harakat qildik va o'tgan mag'lubiyatlarni shu chiroyli g'alabamiz bilan “yuvdik” deb o'ylayman. Ushbu tanaffusda jamoadan ketganlar bor, ularning o'rniga kelgan yangi Botir Qoraev,Sarvar Jo'raev, Sunnat Mamadaliev kabi futbolchilarimiz ham bor. Bu omil ham o'z samarasani bermasdan qolmadi. Yigitlar bugun ishonchimni oqlashganidan hursandman va ularga buning uchun alohida o'z minnatdorchiligimni bildiraman. Bundan tashqari, bugun g'alabaga bunchalik oson erishishimizni kutmagandik. “Neftchi”dan kuchli o'yin kutgandik. Sababi, shu kungacha joriy chempionatda farg'onaliklar 15 uchrashuvda atigi 9 ta gol o'tkazishgan ekan, bugun esa bir uchrashuvning o'zida to'rtta gol raqibimiz uchun achinarli hol bo'ldi deb o'ylayman. Lekin bu bilan mehmonlar etarlicha qarshilik ko'rsatmadi deb hisoblamayman. To'g'ri bizda ham hatolar ko'zga tashlanib turdi. Birgina Eldor Tojiboevning noaniq harakati bilan o'z darvozamizga gol o'tkazib yubordik. Ammo yigitlar o'yinni tiklashga erishdi va bugun biz g'alaba qozondik.

Bugungi g'alabaga “Neftchi” jamoasining bazi futbolchilari maydonga tusholmagani sabab bo'ldimi yoki “SHurtan” tarkib jihatddan biroz o'zgargani o'z samarasini berdimi?

Doimiy ravishda ijobiy natijalarni va kuchli o'yin namoish etib kelayotgan jamoa bir-ikkita futbolchisi sababli o'z o'yinini yo'qotib qo'yishi mumkin deb o'ylamayman. SHu sababdan, jamoamizdagi o'zgarishlar ko'proq yordam berdi deb hisoblayman. Keyingi uchrashuvlarga ham jiddiy tayyorgarlik ko'rib, mavsum yakuniga qadar muhlislarimizni hursand qilamiz va ishonchlarini oqlaymiz degan umiddaman.