Murod Ismoilov: "Navbahor"ga qarshi o'yinda tarkibda o'zgarishlarni amalga oshirishimiz mumkin"

"Paxtakor" bilan o'yindan so'ng o'tkazilgan matbuot anjumanida Murod Ismoilov aynan vodiy derbisi oldidan ham o'z fikrlarini aytib o'tgandi. Farg'onaliklar ustozining aytishicha "Neftchi" bugun faqat g'alaba uchun maydonga tushadi.

- Futbolchilarimizning jismoniy xolati yaxshi. Faqat ularni hozirda ruhiy xolatini ko'tarishimiz kerak. Yigitlarning hammasi ilgari yuqori saviyada o'ynagan. Nazarimda ularga ozgina ishonch etishmayapti. SHularni bartaraf eta olsak, hammasi yaxshi bo'lishiga ishonaman. Buning uchun ozgina vaqt kerak. "Navbahor" bilan kechadigan o'yinda tarkibda ayrim o'zgarishlarni amalga oshirishimiz mumkin. Negaki ayrim yigitlar o'zlariga bildirilgan ishonchi oqlay olishmadi. Tarkibimizda bir qator yoshlar o'zlarini ko'rsatishga erishmoqda. Agarda ularga ishonch bildirmasak o'sishdan to'xtab qoladi. SHu bilan birga natija ham bo'lishi kerak. SHuning uchun bu qiyin jarayon. Derbida tarkibda 1-2ta o'zgarishlar bo'ladi. Lekin asosiy tarkibni tez-tez o'zgartirish ham o'zini oqlamaydi. Sababi yigitlarni bir-biriga o'rganib olishida bu xolat halaqit beradi.

- Biz uchun har bir o'yin qiyin bo'ladi. Nafaqat Namangandagi uchrashuv. Balki undan keyingi o'z maydonimizda "Qizilqum" qarshi kechadigan bahs ham xohlaymizmi yo'qmi oson bo'lmaydi. "Navbahor" ham kuchli jamoa. Biz bo'lajak o'yinga har doimgidek jiddiy qarab, unga puxta tayyorgarlik ko'rishga harakat qilamiz. Vodiy derbisi azaldan qiyin kechgan. Unda ko'p narsa omadga ham bog'liq.