Muhammad Yusuf xotira turnirida “CHAMPIONAT.ASIA” ikkinchi bo'ldi

Joylarda ijodiy kechalar, tadbirlar, sport musobaqalari tashkil etilyapti.

Jumladan, bugun poytaxtimizdagi “Jar” sport majmuasining kichik arenasida Muhammad Yusuf xotirasiga bag'ishlangan futbol turniri o'tkazildi. O'zbekiston “Milliy tiklanish” demokratik partiyasi, O'zbekiston yozuvchilar uyushmasi, O'zbekiston futbol federaciyasi hamda Terma jamoalar markazi hamkorligida tashkil etilgan musobaqada jurnalistlardan iborat jami 6 ta jamoa ikki guruhga bo'lingan holda ishtirok etdi.



Qura natijasiga ko'ra, “A” guruhidan - “Milliy tiklanish”, “Yoshlik” jurnali, “CHAMPIONAT.ASIA”, “V” guruhidan - “O'zbekiston futboli”, MTRK (O'zbekiston Milliy teleradio kompaniyasi terma jamoasi), “Sport” telekanali jamoalari joy olishdi.

“A” GURUHI O'YINLARI
“Milliy tiklanish” - “CHAMPIONAT.ASIA” - 1:3
“Yoshlik” - “Milliy tiklanish” - 0:3
“Yoshlik” - “CHAMPIONAT.ASIA” - 1:2

“V” GURUHI O'YINLARI
“O'zbekiston futboli” - “Sport TV” - 2:1
MTRK - “O'zbekiston futboli” - 5:0
MTRK - “Sport TV” - 3:0

O'z guruhida 3-o'rinni egallagan jamoalar pley-off bosqichida 5-o'rin, 2-o'rin egalari 3-o'rin, guruh g'oliblari esa, turnir g'olibligi uchun hal qiluvchi finalda to'qnash kelishdi. Demak, natijalar bilan tanishing:

5-o'rin uchun o'yin: “Yoshlik” - “Sport TV” - 4:4 (pen. bo'yicha 3:2)
3-o'rin uchun o'yin: “O'zbekiston futboli” - “Milliy tiklanish” - 6:2
FINAL: MTRK - “CHAMPIONAT.ASIA” - 0:0 (pen. bo'yicha 2:0)
SHu tariqa, guruh o'yinlarini yuz foizlik natija bilan yakunlagan jamoamiz hal qiluvchi final uchrashuvida O'zbekiston Milliy teleradio kompaniyasi terma jamoasiga faqatgina penaltilar seriyasida imkoniyatni boy berib qo'ydi. Asosiy vaqtda bir nechta golga tortadigan vaziyatlar sodir etilgan bo'lsada, lekin bundan futbolchilarimiz unumli foydalana olishmadi. Ha mayli, tayyorgarliksiz ishtirok etgan jamoa uchun vice-chempionlik ham yomon natija emas. Bu safar bo'lmasa, kelgusi safar albatta chempionlik shohsupasiga ko'tarilamiz.



Musobaqa yakunida g'olib va sovrindorlarni tantanali taqdirlash marosimi o'tkazildi. Marosimda turnir tashkilotchilaridan biri, O'FF Terma jamoalar markazi direktori Asqar Tolibjonov xassos shoir Muhammad Yusufni shunday xotirladi.  

- Sevimli shoirimiz Muhammad Yusufning barcha sherlari xalqimiz qalbidan chuqur joy olgan, ularning ko'pchiligi hofizlar tomonidan kuyga solingan. Betakror ijod sohibi, sherlarida Vatan va yorga muhabbat, mehr-sadoqat, go'zallik va nafosatni madh etgan shoir ijodi samimiyligi, xalqchilligi bilan ajralib turadi. Bu yil Prezidentimiz Qaroriga binoan respublikamiz miqyosida Muhammad Yusuf tavalludining 60 yilligi keng nishonlanyapti. O'z o'rnida biz ham ushbu qutlug' sanaga o'z xissamizni qo'shish maqsadida O'zbekiston “Milliy tiklanish” demokratik partiyasi hamda O'zbekiston yozuvchilar uyushmasi bilan hamkorlikda jurnalistlar o'rtasida futbol turnirini tashkil etdik. Mana hozir ushbu musobaqani ko'tarinki kayfiyatda yakunladik. O'ylaymanki, bu musobaqa ananaviy bo'lib qoladi.

Taqdirlash marosimida g'olib va sovrindorlarga tashkilotchilarning qimmatbaho sovg'alari topshirildi. SHuningdek, bir nechta nominaciya bo'yicha ham g'oliblar aniqlandi. Bizning jamoadan ham ikki kishi o'z yo'nalishlarida tengsiz bo'lishdi. Eng yaxshi himoyachi nominaciyasida ikkinchi qavatdagi kurashlarda umuman yutqazmagan Bahodir Mirzaev haqli ravishda g'olib chiqdi.