Mirjalol Qosimov: “Ahmadaliev terma jamoaga chaqirilishga haqli”

Marosimning ikkinchi qismida mezbonlar bosh murabbiyi Mirjalol Qosimov ishtirok etdi va jurnalistlarni qiziqtirgan savollarga javob berdi. 

M.Qosimov: Oldindan o'yin qiyin bo'lishini bilardik. Futbol shunday o'yinki, unda yuzaga keltirilgan vaziyatlardan unumli foydalana olmasa, yanada og'irlashadi. Lekin bugungi o'yinda vaziyatlardan foydalanib, muhim uch ochkoni qo'lga kiritganimizdan xursandman. Ammo, bir oylik tanaffus tasirida biroz bo'lsada, o'yin ritmidan chiqib ketganimiz ham bor gap. Endi shu o'yinlar orqali yana yuqori sport formasiga chiqib olishga harakat qilamiz. 

Kechagi o'yin oldidan o'tkazilgan mashg'ulotga kelsak, buning o'ziga yarasha sabablari bor. Ketma-ket uchrashuvlar, turli tadbirlar natijasida maydon chimining sifatiga putur etdi. 23 iyun kuni Xalqaro olimpiya kuni, 30 iyunda Yoshlar kuni munosabati bilan tadbirlar o'tkazildi. O'smirlar o'rtasidagi Markaziy Osiyo chempionati uchrashuvlari va har kuni ishtirokchi terma jamoalarning mashg'ulotlari ham shu stadionda bo'lib o'tdi. Biz o'ylamasak, boshqa hech kim maydon sifati haqida qayg'urmaydi. SHu sababli ham bir kun oldingi mashg'ulotlarni akademiya maydonida o'tkazishga majbur bo'ldik. 

To'g'ri, agar jamoani saqlab qolish uchun etakchi futbolchilarni sotish kerak bo'lsa, bunga tayyor ekanligimni aytgandim. Lekin transferlar oynasi ochilgan paytda bizni qoniqtiradigan taklif bo'lmadi. SHu sababli ham tarkibni saqlab qolishga qaror qildik. Jamoadan birgina Umirov ketdi. 

Dilshod Ahmadaliev yarim yil futbol o'ynamadi. Baribir bu holat o'z tasirini o'tkazmay qolmaydi. Lekin ishoning, bu futbolchi nafaqat “Bunyodkor”ning, balki O'zbekistonning ham eng kuchli o'ng qanot himoyachisi hisoblanadi. Uni terma jamoaga chaqirish kerak. 

SHahboz Beg'amov yozib oldi