Mirabror Usmonov: "Yangi yil muborak"

Bu haqda O'FF rasmiy tvitteri xabar berdi.

Mirabror Usmonov: "2013 yil ham tarixda qolayapti. Yangi yil bilan birga yangi rejalar, yangi maqsadlar va yangi dovonlar kirib kelayapti. 2013 yilda yaxshi kunlar ham bo'ldi, yomon davrlar ham bo'ldi. Bu kunlar, avvalo, O'zbekiston futboli uchun va uning boshqaruvchisi sifatida - men uchun katta sinov davri bo'ldi. Ana shunday vaqtlarni men bilan yashagan futbol ishqibozlari, jurnalistlar va umuman barcha-barchaga minnatdorchilik bildiraman. 2013 yilda O'FFning Hisobot-saylov konferenciyasi meni yangi muddatga prezident etib sayladi. Men omadli va baxti insonmanki, mana shunday ahil va kuchli jamoa bilan yana 4 yil davomida birga ishlayman. Ammo, bilamanki, yangi davrda biz maqsadlarni, rejalarni yanada kattaroq qo'yamiz. Katta rejalar tuzib, ko'p ishlaymiz! CHunki, xalq bizdan milliy terma jamoaning Jahon chempionatiga chiqishini kutayapti va biz buni juda yaxshi his qilamiz! 2014 yil bizning Jahon chempionati sari navbatdagi yurishimizda muhim yillardan biri bo'ladi deb umid qilaman. Umid qilamanki, 2014 yil nafaqat milliy, balki yoshlar, o'smirlar, ayollar, futzal, nogironlar terma jamoalari uchun samarali bo'ladi, ishonamanki, 2014 yil, shuningdek, futbol klublarimiz, milliy chempionatimiz, referilarimiz uchun ham esda qolarli yil bo'ladi. "Sog'lom bola" yilida barcha ota-onalarga sog'lom, irodali, kuch-g'ayratli farzand, O'zbekistonga sog'lom avlod kamolotini tilayman.

Aziz do'stlar! Kirib kelayotgan yangi 2014 yil oilangizga tinchlik, ro'zg'oringizga baraka olib kirsin. Sog'-salomat bo'ling!