MDH kubogida akrobatik tarzda gol urgan Bahodir Nasimov “Rubin”ga qanday qilib borib qolgandi?

O'tkazilgan to'rtta uchrashuvda beshta gol urib, goleadorlik hislatini namoyish qilgani yodingizda bo'lsa kerak. Ayniqsa, guruh bosqichidagi birinchi uchrashuvda Moldovaning “Dachiya” darvozasiga akrobatik tarzda kiritgan to'pi skautlarni etiborini o'ziga jalb qilgandi. O'sha musobaqani Nasimovning o'zi shunday yodga oladi:

“O'sha paytda Samarqandning “Dinamo” jamoasida o'ynardim. Meni “Bunyodkor”ga Erkin Baydullaev va Azamat Abduraimov tavsiya qilgan ekan. "Seni poytaxtga taklif qilishmoqda, borasanmi?"-, deb so'rashdi. Buni rad qilmadim va rozi bo'ldim. Toshkentda bir nechta o'rtoqlik uchrashuvlarida qatnashganimdan so'ng murabbiy Hikmat Ergashevga maqul keldim va meni MDH kubogiga olib ketdilar. “Qaldirg'ochlar” safiga ijara asosida qo'shilgandim.

Turnirdagi o'yinlarimni “Rubin” jamoasi vakillari ko'rgan ekan. Bundan tashqari yana 4-5ta Rossiya klublaridan chorlov olgandim. “Bunyodkor”ni o'zi ham olib qolmoqchi bo'lgandi. Toshkentga kelganimdan keyin Azamat Abduraimov bilan ko'rishdim. Qozon klubi bosh direktori, hozir "Buxoro" bosh murabbiyi bo'lib ishlayotgan Muhsin Muhammadiev menga qiziqish bildirayotganligini aytdilar. Ular “Dinamo”dan mening transferimni sotib olishdi”,- deydi hozirda Jizzaxning “Sug'diyona” jamoasi sharafini himoya qilayotgan hujumchi.

Quyida Bahodir Nasimovning o'sha mashhur golini tomosha qilishingiz mumkin.