"Matonat futbol" nogiron-amputantlar futbolini rivojlantirish markazi ish boshladi

Agarda tarixga nazar tashlaydigan bo'lsak, 1988 yili mamlakatimizda nogiron-amputantlar futboliga asos solingan. Nogiron-amputantlar terma jamoamiz azolari besh karra jahon chempioni hisoblanadi. Jumladan, 1990 (AQSH), 1991 ( O'zbekiston), 2007 (Turkiya). 2010 (Argentina) hamda 2012 (Rossiya) yilgi jahon chempionatlarida oltin medallarni qo'lga kiritgan bo'lishsa, 1988 (kumush) va 2002 yilgi (bronza) mundialning sovrinli o'rinlarni band etishgan. 

SHuningdek, “Rahm-shavqat“ (1989, 1990, 1991 yillar), “Trud“ gazetasi sovrini (1991 y), “G'alaba kuni“ (1992 y), “Spartak Kubogi“ (1993 y), “Baynalminal jangchilar“ sovrini (1993 y), “Nogironlar futboli associaciyasi“ (1993 y), “Rojdestvo“ (1995, 1996, 1997 y.y.), Rossiya ochiq chempionati – (1996 y), Gruziya nogironlar federaciyasi sovrini (1998 y), Xalqaro nogironlar festivali (1999 y), Rossiya nogironlar Ittifoqi sovrini (2006 y), MDH Kubogi (2007 y), singari xalqaro turnirlarda bosh sovrinni, qolaversa, Evropa ochiq chempionati (1999 y), Rossiya ochiq chempionati (2006 y) bronza medallarga egalik qilishgan.

“Matonat futbol“ nogiron-amputantlar futbolini rivojlantirish markazi – 2020 yil 17 yanvar kuni davlat ro'yxatidan o'tdi. Ayni paytda o'z nizomiga ega. Markaz o'z oldiga ulkan maqsadlarni qo'ygan. Xususan, “Matonat“ nogiron-amputantlar futbol jamoasining avvalgi shon-shuhratini qayta tiklash, respublikamiz viloyatlarida imkoniyati cheklangan ammo sportga va futbolga qiziqishi bo'lgan insonlarni izlab topish, mamlakat terma jamoasiga munosib o'rinbosarlarni tayyorlashdan iborat. 

Yana shuni qo'shimcha qilish lozimki, 2020 yil 27, 28 va 29 mart kunlari “21 mart – Navro'z umumxalq bayrami“ga bag'ishlangan futbol turniri uyushtirilishi rejalashtirilgan. Mazkur turnir – O'zbekiston chempionati maqomida tashkil etiladi. Yani, 17 yillik tanaffusdan so'ng nogiron-amputantlar o'rtasida mamlakat birinchiligi o'tkazilishi ko'zda tutilgan. Ayni paytda markaz xodimlari tomonidan bo'lajak musobaqaga tayyorgarlik ko'rish ishlari olib borilmoqda. CHempionatning nizomi ishlab chiqildi va O'zbekiston futbol associaciyasi tomonidan tasdiqlandi.