Matbuot anjumani (to'liq). O'zbekiston ayollar terma jamoasi bosh murabbiyi Kotrina Kulbite: "Futbolchilarda katta salohiyat bor, maqsadimiz Jahon chempionati va Olimpiadaga yo'llanma olish"

Bugun O'FA majlislar zalida terma jamoamizning yangi ustozi va OAV o'rtasida matbuot anjumani bo'lib o'tdi. Unda jurnalistlar o'zlarini qiziqtirgan savollar bilan murojaat qilishdi. 

"Men O'zbekistonda ish boshlaganimdan xursandman. Bu mamlakat katta tarixga ega. O'zbekistonda futbolga katta etibor berishmoqda, buni tushunib turibman. Taklif tushganida bir qarorga kelishim qiyin bo'lmadi. Yaqinlarim bilan maslahatlashgan holda kelishuvga erishdik. O'zbekiston ayollar terma jamoasi bilan katta yutuqlarga erishishimga ishonaman",- deya gap boshladi Kotrina Kulbite. 

- Yangi jamoa, boshqacha muhit, darajasi turlicha bo'lgan joyga kelayotganingizda o'sha mamlakat futboli, chempionati, ayol futbolchilarini o'rganish siz uchun qanchalik muhim? Sizda qanday xulosalar bor?

- O'zbekiston ayollar terma jamoasini avvaldan bilganman. Ularga qarshi turli musobaqalarda o'ynaganmiz. Bu erga kelganimda futbolchilarni bilib olishim uchun O'FA rahbariyati o'quv-mashg'ulot yig'inini tashkil qilib berdi. Bundan xulosam shu bo'ldiki, O'zbekiston ayollar terma jamoasi futbolchilarida juda katta salohiyat bor. 

- O'FA siz bilan muzokara jarayonida oldingizga aniq vazifa qo'ydimi?

- Hozirgi kundagi asosiy etiborimiz Osiyo chempionati saralashiga tayyorgarlik ko'rish. Keyingi yilda Osiyo chempionati bo'lib o'tadi. Maqsadimiz Jahon chempionati va Olimpiada o'yinlariga yo'llanma olish. Xabaringiz bor, bu musobaqalarga kvotalar soni ko'paytirilgan. 2029 yilgi Osiyo chempionati O'zbekistonda bo'lib o'tadi. Bunda ham yuqori natijalarni qo'lga kiritishni maqsad qilganmiz. 

- O'zbekiston terma jamoasida avval yaponiyalik murabbiy Midori Xonda ishlagandi. Bunda til bilan bog'liq muammo bo'lgandi. Bu safar bosh murabbiy MDH mamlakatlaridan qidirildi. Futbolchilar bilan muloqotda muammo bo'lmaydimi?

- Men rus tilida tushunaman va gapira olaman. Futbolchilar bilan muloqotda muammo yo'q.

- Aksariyat mamlakatlarda katta futboldagi qizlar futzalda ham o'ynashadi. O'zbekistonda ayollar futzal jamoalari yo'qligi uchun futboldan olinadi. Yozda ayollar o'rtasida Osiyo chempionati bor. Katta futbolda esa saralash o'yinlari kutib turibdi. Bu pallada qizlarni futzalga qo'yib yuborasizmi?

- Mazkur masalada muammo bo'lmaydi. Biz futzal federaciyasi bilan birgalikda buni ko'rib chiqamiz. O'ylaymanki, qizlar futzalda ham, futbolda ham yutuqlarga erishishadi. Hozirda CAFA turniri bo'lib o'tmoqda. U erda Feruza, Ilvina kabi o'yinchilarimiz to'p tepmoqda. Tajribali futbolchilar katta futbolda ham kerak. 

- Sizning boshchiligingizda yig'in tashkil qilindi. Ushbu mashg'ulotlardan qanday taassurotlar oldingiz?

- Bir narsani unutmaslik kerakki, bu mavsum oldi yig'ini edi. Hozirda biz futbolchilarning jismoniy sifatlarini oshirishga qaratmoqdamiz. Hayron qoldirgani, ularning texnik tayyorgarligi. Ular bu tomondan tayyor. Biz har doim yuz foizga tayyor bo'lishimiz kerak. 

- O'zbekistonga o'z murabbiylar shtabingiz bilan keldingizmi yoki bu mahalliy mutaxassislardan tuzildimi?

- O'FA murabbiylar jamoasini taqdim qilgan. Vladimir Panov, Mahliyo Sarikova katta yordam berishmoqda. 

- Yaqinda Jahon chempionatiga saralash bahslari boshlanadi. Qisqa vaqt ichida nimalarni yaxshilash kerak?

- Tayyorlanishga vaqtimiz kam. Saralashga yaxshi hozirlik olib borish uchun o'quv-mashg'ulot yig'inlarini olib boramiz. Yaqin orada 3 ta uchrashuv o'tkazishimiz rejalashtirilgan. Janubiy Koreya, Iordaniya va Tailand bilan o'ynaymiz. Bundan keyingi raqiblarimizni ham elon qilamiz. 

- Kotrina Kulbite OAV, media bilan ishlashga qanday qaraysiz? Ochiq murabbiymisiz yoki yopiq?

- OAV bilan ishlashga har doim tayyorman. Ayollar futboli haqida ko'proq gaplashishimiz kerak. Har qanday yordam kerak bo'lsa marhamat. Ayollar futbolini yangi cho'qqilarga olib chiqishni niyat qilganman. Men ham murabbiy, ham inson sifatida o'z hissamni qo'shishga harakat qilaman. Ayollar futboli atrofidagi insonlar ham o'z ishlarini qilib yutuqlarga yordam berishlari kerak.

- Osiyodagi kuchli jamoalar Avstraliya, Yaponiya darajasiga chiqish uchun ko'proq nimalarga urg'u qaratish zarur?

- Biz har bir FIFA kunlarida kerakli yig'inlar, uchrashuvlar tashkil qilishimiz darkor. Bu orqali o'zimizning darajamizni ko'tarib boramiz. 

- O'zbekistonda har doim yashaysizmi? Ayollar chempionatining viloyatlardagi uchrashuvlarini kuzatasizmi?

- Ha, men ish vaqtim O'zbekistonda bo'laman. Nafaqat terma jamoada, balki skauting, murabbiylarni rivojlantirishda yordamimni beraman. Yaqinda "Bunyodkor" va "Paxtakor"ning o'yinlarini kuzatdim va kerakli malumotlarni to'pladim. Ayollar futboliga etibor erkaklarnikiga qaraganda kuchlimas. Lekin har bir erkaklar futbol klubi ayollar jamoasiga ega bo'lishi kerak. O'FAda ayollar futbol bo'limi bor. Hamma rivojlanishga birgalikda hissa qo'shishi kerak. 

- Evropa va Osiyo ayollar futboli darajasida qanday farq bor?

- Evropa futboli rivojlangan. Biz bazi bir Evropa mamlakatlari terma jamoalari bilan o'ynamoqchimiz. Ularda kuchli jamoalar ko'p.

Abdulaziz Iskandarov yozib oldi