"Mashal" ikkinchi davra oldidan yangi futbolchilarni tanishtirdi FOTO

Klub tarkibiga "Oq-tepa"dan Mirzakamol Kamolov, "Qizilqum"dan Andrey Derkach, "Navbahor"dan Vladislav Pavlenko hamda "SHo'rtan" jamoasidan Kenja To'raev qo'shildi.

Tadbirda "Mashal" klubi bosh direktori Ilhom Qurbonov, "Mashal" klubi akademiyasi direktori Abdurahmon Yumangulov va jamoa katta murabbiyi Maqsud Irisbaev hamda yangi futbolchilar ishtirok etishdi.

Dastlab yangi o'yinchilar o'z fikrlarini bildirib o'tishdi.

Mirzakamol Kamolov: "Mashal"dan taklif tushgach uni qabul qildim. Jamoani kuchaytirishga harakat qilaman. Murabbiylar ishonchini oqlashga urinaman.

Andrey Derkach: Barchaga malum, "Mashal" men uchun begona jamoa emas. 2014 yil boshida ushbu klub orqali o'zbek futboliga kirib kelgandim. Mana bir yarim yildan so'ng ushbu klubga qaytdim. Bu erda ko'pchilikni taniyman. Jamoaga tezda qo'shilib ketdim.

Vladislav Pavlenko: "Navbahor"da yarim davra o'ynagach menga Muborak klubidan taklif kelib tushdi. Aleksandr Xomyakov meni o'z jamoasida ko'rishni istagani uchun shu erdaman. Jamoa muxlislarini quvontirish uchun qo'limdan kelgan ishni qilaman. "Mashal" bilan yuqori natijalar qayd etmoqchiman.

Kenja To'raev: "Mashal" o'zbek futbolida o'z o'rniga ega bo'lgan jamoa hisoblanadi. Klub o'z akademiyasidan chiqqan futbolchilar hisobiga yuqori o'rinlarda yuradi. Maqsadim ko'plab gollar urib muxlislar va klub rahbariyatini quvontirish.

SHundan so'ng har bir futbolchiga "Mashal" klubi futbolkalari topshirildi. Muborak klubida Mirzakamol Kamolov 8, Andrey Derkach 33, Vladislav Pavlenko 17 va Kenja To'raev 23-raqamda o'ynaydigan bo'lishdi.