“Fair-play”ni “Mashal”ga beringlar

2025 yilgi O'zbekiston Superligasi mavsumi aynan shu jihatdan bir jamoani alohida ajratib ko'rsatdi. Gap Muborakning “Mashal” jamoasi haqida ketmoqda.

Mavsum davomida turli qiyinchiliklar, begona maydonlar, kuchli raqiblar va turli bosimlarga qaramasdan, “Mashal” futbolga xos eng muhim qadriyatlarni saqlab qoldi. Shu boisdan ham “Fair-play” mukofotiga eng munosib nomzod aynan shu jamoa ekaniga sabablar etarlicha.

Qizil kartochkasiz o'tgan butun mavsum

Mavsumning eng qiziq va ahamiyatli statistikalaridan biri shuki, “Mashal” Superligada qizil kartochka olmagan yagona klub bo'ldi. 30 turlik marafon davomida muborakliklar futbolchilari bor-yo'g'i 51 marta sariq kartochka bilan jazolandi, xolos.

Bu shunchaki raqam emas. Bu – maydondagi intizom, o'zini tuta bilish, ehtirosni nazorat qilish va hakam qarorlariga hurmat namunasidir. Qizig'i, bunday natija o'tgan yili Navoiyning “Qizilqum” jamoasi tomonidan qayd etilgandi. Demak, “Mashal” ushbu ijobiy ananani munosib davom ettirdi. Nima uchun mazkur klub “Fair-play”ni olishi kerak degan savolga birinchi javob shu edi.

Sport principlari ustuvor qo'yildi

Bu yil Superligada Qashqadaryo viloyatidan uchta jamoa ishtirok etdi. Oxirgi bor bunday holat 2017 yilda kuzatilgan. Oddiy qilib aytganda, bir hudud jamoalari o'rtasidagi o'yinlarda bazan yashirin  “hurmat” sezilib qoladi.

Biroq “Mashal” bu qoidani sindirdi. Chempionlik uchun kurashayotgan “Nasaf”ga qarshi bahsda muborakliklar maydonda haqiqiy jang taklif qilishdi. Hech qanday tashqi omil, turnir jadvali yoki qo'shnilik munosabatlari tasir etmadi. Yakunda “Mashal”ning g'alabasi nafaqat turnir jadvali taqdiriga tasir qildi, balki Superligada sport principlari hali ham mavjud ekanini isbotladi.

O'z uyisiz ham yaxshi mavsum

2025 yilgi Superligada faqat ikki jamoa – “Paxtakor” va “Mashal” o'z stadionida o'ynay olmadi. Agar “Paxtakor” uchun “Jar” maydoni avvaldan tanish bo'lsa, “Mashal” uchun vaziyat ancha og'ir kechdi.

Muborakliklar raqiblarini Olmaliq, G'uzor va hatto Qarshida qabul qilishga majbur bo'ldi. Bundan tashqari, “So'g'diyona” bilan ikki bor Jizzaxda, “Surxon” bilan esa ikki marta Termizda nominal mezbon sifatida maydonga tushdi. Bu esa qo'shimcha safarlar, xarajatlar va jismoniy charchoq degani. Shunga qaramay, jamoa intizomdan chekinmadi.

Barqaror tizim va yoshlar natijasi

“Mashal”ning “Fair-play”ga loyiq ekanini ko'rsatuvchi yana bir muhim jihat – klub tizimining barqaror ishlayotgani. Asosiy jamoa Pro ligadan chiqib, Superligada o'z o'rnini saqlab qoldi. O'rinbosarlar jamoasi musobaqani o'rta o'rinlarda yakunladi.

Eng muhimi, U-19 jamoasi bronza medallarini qo'lga kiritdi. Ular uchinchi o'rin uchun bahsda amaldagi finalchi “Bunyodkor”ni Toshkentda mag'lub etdi. Bu esa “Mashal” nafaqat bugunni, balki ertangi kunni ham o'ylayotganini ko'rsatadi.

Futbolda ayrim qadriyatlar borki, ular vaqt o'tishi bilan ham o'z qimmatini yo'qotmaydi. Intizom, halol o'yin, raqibga hurmat va sport principlariga sodiqlik – shular jumlasidan.

2025 yilgi Superligada aynan shu jihatlar “Mashal” timsolida yorqin namoyon bo'ldi. Shu boisdan ham bir fikr o'z-o'zidan tug'iladi:

“Fair-play” mukofoti “Mashal”ga berilsa, u to'liq adolatli qaror bo'ladi.