Maksim Shackix: "Jamoamizda "Andijon" darajasiga mos bo'lmagan futbolchilar bor"

- O'yin haqida fikringiz?

- Nima deyishni ham bilmayman. Birinchi taymda o'tkazilgan gollarni ko'rdingiz. Juda kulgili. Bizda ham hech bo'lmasa bitta shunaqa gol bo'lganida edi, o'zimni baxtiyor his qilardim. Ikkinchi taymda vaziyatni o'nglashga harakat qildik. Ammo oxirgi daqiqalarda uchta gol qabul qilib oldik. Bor gap shu.

- Juda achinarli mag'lubiyat bo'ldi. Jamoada nimanidir o'zgartirish kerakmi?

- Bizga faqat vaqt kerak. Hamama narsaga vaqt zarur. Ikki-uch oyda jamoa tuzib bo'lmaydi. Yangi futbolchilar ko'p, lekin ular bir jamoa bo'lishi uchun vaqt kerak. Eng muhimi, bu ruhiyat bilan bog'liq. Kim qaerda o'ynaganining farqi yo'q. Hozirgi paytga qarash kerak. Vaqt bo'lsa, umuman boshqa jamoa ham bo'ladi.

- Ikkinchi davra boshlangach, 5ta uchrashuv o'tkazildi. Shu beshta o'yindan 4 ochko olishni qanday izohlaysiz?

- Mag'lubiyatga uchragan har bir o'yinimizni tahlil qilib ko'ring, albatta nimadir sabab bo'ladi. "Navbahor", "Mashal", mana bugun "Paxtakor" - shu jamoalarga yutqazgan o'yinimizni ko'rib chiqsangiz hammasi tushunarli bo'ladi. "Paxtakor"da individual jihatdan kuchli futbolchilar yig'ilgan. Shu bois ular kuchli. Biz esa jamoa bo'lib o'ynashga harakat qilyapmiz. Birinchi uchta golni qarang, hatto bolalar futbolida bunaqa gollar o'tkazilmaydi. Yana nima deyishim mumkin. Bugungi o'yin bizga katta dars bo'ldi. Keyingi bahsda kimni o'ynatish, kimni zaxirada qoldirishni ko'rib oldik.

- Oltita gol o'tkazgan Erjan Tokotaevning o'yinini qanday baholaysiz?

- Erjan bir necha bor jamoamizni qutqardi. Uning xatolarini darvozabonlar murabbiyi bilan gaplashib tahlil qilamiz.

- Himoyachilar o'yini haqida fikringiz?

- Bugun Altin Kreziuni himoya markazida sinab ko'rdik. Shuningdek Abdurahmon Komilov ham o'ynadi. Jamoamizda "Andijon" darajasiga mos bo'lmagan futbolchilar bor. Lekin ular klubga mosmiz deb o'ylaydi. Bu juda yomon. Ammo bunday o'yinlar kim qanaqa ekanini ko'rsatadi. Afsuski, biz darhol o'zgarish qila olmaymiz. Aytib o'tganimdek, hammasiga vaqt kerak.