"Lokomotiv" himoyachisi va tojikistonlik futbolchi "Andijon" yig'iniga qo'shildi

Bugun "Andijon" safiga yangi o'yinchilar keladigan kun. 

Ulardan biri bir necha daqiqa oldin jamoa istiqomat qilayotgan "Asteria Kremlin Palace" mehmonxonasiga etib keldi. Bu – istedodli himoyachi Dilshod Komilov bo'lib, ishqibozlar ushbu o'yinchini “Lokomotiv” klubidagi o'yinlari orqali yaxshi biladilar. 

24 yoshli futbolchi Turkiya yig'iniga "Lokomotiv" bilan birga kelgandi va u bilan muzokaralar ijobiy yakunlangach, Komilov "Andijon" ixtiyoriga ko'chib o'tdi. 

Dilshodni "Andijon" klubi vakillari iliq qarshi oldilar va birozdan so'ng yangi jamoasidagi ilk mashg'ulotini boshlaydi.

"Andijon" safini to'ldirgan navbatdagi yangi futbolchi – tojikistonlik tajribali o'yinchi Axtam Nazarov. 

Klub vakillari Antaliya aeroportida futbolchini kutib oldilar va "Asteria Kremlin Palace" mehmonxonasida "Andijon" bosh direktori Ulug'bek Mirzaev boshchiligidagi rahbariyat futbolchi bilan bir piyola choy ustida suhbatlashdilar.

Qanot himoyachisi Axtam Nazarov Tojikiston milliy terma jamoasining sardori va etakchisi sanaladi. 2012 yildan buyon mamlakatning bosh jamoasi uchun o'ynab kelmoqda. Hozirga qadar terma jamoa libosida 60 ga yaqin uchrashuvda maydonga tushib, 5 ta gol urgan. 

SHuningdek, Nazarov Tojikistonning birinchi raqamli klubi – "Istiqlol" safida uzoq yillardan beri to'p tepib kelgan. Tabiiyki, faoliyati davomida bir qancha sovrinlarni qo'lga kiritgan.

Avvalroq andijonliklar Dilshod Komilov va Axtam Nazarovni safiga qo'shil olishini malum qilgan edik.