"Lokomotiv": Futbolchilarimiz uchun Angliyadagi uch oylik malaka oshirish o'z yakuniga etdi

Ushbu hamkorlikning maqsadlaridan biri o'zbekistonlik yosh futbolchilarning Angliyada malaka oshirishini ham taminlash ko'zda tutilgandi.

Natijada “Lokomotiv”ning ikki tarbiyalanuvchisi – Rustam Nartajiev va Sergey Proxorov tumanli Albionda uch oylik o'quv-mashg'ulot o'tkazish imkoniga ega bo'lishdi. Futbolchilarimiz sentyabrda Angliyaga yo'l olgandi, mana endi uch oylik muddat o'z yakuniga etib, darvozabon va himoyachimiz Toshkentga qaytib kelishyapti.

“Flitvud Taun” murabbiyi Berri Nikolson qo'l ostida mashg'ulotlarda ishtirok etgan Nartajiev bilan Proxorov “Flitvud” safida o'z debyutlarini nishonlashga muvaffaq bo'lishdi. Ular “Karlayl Yunayted” bilan kechgan o'rtoqlik o'yinida maydonga tushishdi.
“Loko” darvozaboni Rustam Nartajiev Toshkentga qaytish oldidan o'z fikrlarini bildirdi: “Biz uch oy mashg'ulot o'tkazib, ancha tajriba to'pladik. Menga Angliyaning ob-havosi ham, odamlarning futbolga bo'lgan munosabati ham yoqdi. Ayniqsa, mashg'ulotlarni aytmaysizmi. Bu erdagi mashg'ulotlar ancha og'ir, qolaversa o'yinchilar ham tezkor va baquvvat. Kundan kunga o'zimni yaxshi his etib bordim. Eng muhimi esa ingliz tilini o'rganib olganim bo'ldi. Hozir bu tilda erkin gaplasha olaman. Endi Toshkentga, o'z jamoam “Lokomotiv” futbol klubi safiga qaytaman. Keyingi faoliyatim qanday kechishi haqida bir narsa deyishim qiyin, chunki hammasini klubimiz rahbariyati hal qiladi. Agar yana Angliyaga kelish imkoniyati paydo bo'lsa yo'q demasdim”.