"Lokomotiv": Endi bor etiborni oliy ligada chempion bo'lish va Kubokni yutishga qaratamiz

Buni ko'proq futbolda ishlab ko'rgan yoki bo'lmasa ishlayotgan kishi tushunadi. Futbolda Siz besh oydan keyin shu ishni qilaman, uch yildan so'ng shunga erishaman deb aniq reja qila olmaysiz. CHunki bu o'yin va o'yindan keyin nima bo'lishini hech kim bilmaydi.

Kecha "Lokomotiv" Osiyo chempionlar ligasining 5-turini o'tkazdi. O'z maydonimizda Saudiya Arabistonining eng kuchli klubini qabul qilib 1:2 hisobida yutqazib qo'ydik. Albatta, bu mag'lubiyat uchun muxlislardan uzr so'raymiz. Kechagi mag'lubiyatdan so'ng "temiryo'lchilar" OCHL bilan xayrlashishdi. Endi jamoa "Fulad" bilan shunchaki guruhda oxirgi o'rinni olmaslik uchun o'ynaydi. Aytish mumkinki, "Fulad"ga qarshi o'yin presstij uchun kechadigan bahs bo'ladi.

Kecha mag'lub bo'ldik va OCHLni tark etdik, lekin hayot shu bilan to'xtab qolmaydi. Biz har qanday tanqidga tayyormiz, chunki yil boshidagi maqsadlar umuman boshqacha edi. Guruhdan chiqa olmagandan keyin muxlislarning tanqid qilishga haqlari bor. Ammo "Lokomotiv" bitta o'yindan so'ng "sinib" qoladigan jamoa emas. Faqat tan olaylik, "Al Hilol" bugungi kunda Osiyoning eng kuchli uchta jamoasidan biri hisoblanadi. Ular shu darajaga etish uchun qancha yillarni yo'qotishdi. "Lokomotiv" esa endi yo'lning boshida turibdi va nasib qilsa bizda ham g'alaba va yutuqlar ko'p bo'ladi.

"Lokomotiv" o'zbek futbolida hali shonli tarixga ega klub emas. Jamoa endi-endi o'zini tiklab yuqoriga qarab intilmoqda. Bu erda ishlayotgan barchaning maqsadi bitta: "Lokomotiv"ning shanini ko'tarish, o'zbek futbolida yana bir kuchli jamoani shakllantirish. Xalqaro maydonlarda o'zbek futboli obro'sini munosib himoya qila oladigan jamoani yuzaga keltirish. Faqat buning uchun vaqt, mehnat va sabr kerak bo'ladi. Futbolda hammasi birdaniga amalga oshib qolmaydi, barchasi mustahkam poydevor evaziga tiklanib boradi.

"Lokomotiv" OCHLni tark etgani bilan hali o'z maqsadidan qaytgani yo'q. Jamoamiz O'zbekiston chempioni bo'lish hamda mamlakat Kubogini qo'lga kiritish uchun kurashishda davom etadi. Ayniqsa, biz uchun oliy ligada birinchi bo'lish judayam zarur hisoblanadi. CHunki "Lokomotiv" o'z tarixida hali bunday yutuqqa erishgan emas. Futbolda hammasi qadam-baqadam. Mana, o'tgan yil Kubokda g'alaba qozongandik, bu yil Superkubokni qo'lga kiritdik. Nasib bo'lsa yil oxirida CHEMPION ham bo'lamiz. SHuningdek, O'zbekiston Kubogini ham yoddan chiqarmaslik kerak. Aytib o'tganimizdek, buning uchun faqat va faqat mehnat qilish lozim. Futbolda bundan boshqa yo'l yo'q. Faqat sabr va mehnatgina insonni o'z maqsadi sari olg'a boshlaydi. "Lokomotiv" - o'z nomi bilan poezdning eng oldi bo'lishi kerak. Jamoamiz shunday bo'lib qolishga harakat qiladi va futbolchilarimiz keyingi bahslarda chiroyli o'yin ko'rsatgan holda g'alaba qozonishga vada berishadi.