Legionerlarimiz qachon Toshkentga kelishadi?

Dastlabki kungi mashg'ulotlarda yig'inga chaqirilgan 7 nafar legionerdan 2 nafari Odil Ahmedov va Sanjar SHoahmedov ishtirok etdi xolos. Qolgan legionerlar qachon terma jamoa ixtiyoriga etib kelishadi? Quyida bu savolga javob beramiz.

Rustam Ashurmatov
"Gvangju" klubi bilan birgalikda Janubiy Koreya K-ligasiga yo'llanmaga ega chiqqan Ashurmatov 4 noyabr kuni Toshkentga etib keladi. Bugun, 3 noyabr kuni "Gvangju" 35-turda o'z maydonida "CHonnam Dragons"ga qarshi o'ynadi va 1:2 hisobida yutqazib qo'ydi. 9 noyabrda "Gvangju" chempionatning so'nggi turini "Tedjon Sitizen" klubiga qarshi safarda o'tkazadi. Klub rahbariyati vazifa muddatdan avval bajarilani bois o'zbekistonlik futbolchini ertaroq terma jamoa ixtiyoriga qo'yib yuborishga rozi bo'ldi.

Ikrom Aliboev
"Seul" bugun o'z maydonida "Ulsan Xorang-I"ni qabul qildi va 0:1 hisobida yutqazib qo'ydi. Klub navbatdagi uchrashuvni 23 noyabrda o'tkazadi. SHunday ekan Aliboev ham erta-indin terma jamoa tarkibida mashg'ulot o'tkazishi kutilmoqda.

Otabek SHukurov
BAA pro-ligasida peshqadamlik qilayotgan "SHarja" klubi 7 noyabr kuni "Al Jazira" mehmoni bo'ladi. Aynan mana shu bahsdan keyin Otabek SHukurov O'zbekistonga qarab uchadi. SHukurov Qirg'iziston bilan bahsga qadar Toshkentga etib keladi, ammo Abramov unga dam bersa kerak.

Temurxo'ja Abduxoliqov
Yaqindagina yana legionerga aylangan Temurxo'ja Abduxoliqov o'ynayotgan "Xorfakkan" 8 noyabr kuni "Ajman" mehmoni bo'ladi. Ushbu uchrashuvdan so'ng hujumchimiz Toshkentga etib keladi va Qirg'iziston bilan bahsda ishtirok etmaydi.

Eldor SHomurodov
Bugungi kunda terma jamoamiz etakchilaridan biriga aylanib olgan Eldor SHomurodov faoliyat olib borayotgan "Rostov" klubi 9 noyabr kuni Rossiya premer-ligasi 16-turi doirasida "Tambov"ni qabul qiladi. Ko'rib turganingizdek terma jamoamiz Toshkentda Qirg'iziston bilan o'ynayotgan paytda SHomurodov Rostovda "Tambov" bilan o'ynayotan bo'ladi. Eldor katta ehtimol bilan 11 noyabr kuni terma jamoa safida to'liq kuch bilan mashg'ulot o'tkazadi.