Kundalik #2. Yana "Arsenal" akademiyasidamiz

Tungi mashg'ulotlar aynan mana shu arenada bo'lib o'tdi. Avvalgi safar kelganimda faqat asosiy maydonga etibor qaratgan edim, endi esa mashg'ulot maydonlari bilan ham yaqindan tanishdim. Bir gap aytmay ilojim yo'q, agar bizda shunday akademiyadan 5tasi bo'lsa, "nega JCHga chiqa olmadik", deb emas, "nega JCHda yutqazib qo'ydik" deya murabbiylarimizni koyiyotgan bo'lar edik. Akademiyada bir nechta maydon bo'lib, ularning barchasi bir xil saviyada. Birontasini ajratib ko'rsata olmaysiz. Stadion hududi ham ancha katta. Asosiy maydonda BAAning regbi bo'yicha milliy terma jamoasi uy o'yinlarini o'tkazadi. Bu stadionda 30 dekabr kuni "Real Madrid" va "Milan" jamoalari o'zaro kuch sinashadilar. Qaytishim 29 dekabrda, yana bir kun qolib o'yinni ko'rsam bo'lar edi, ammo to'g'risini aytaman, biznikilar oldida bunday top klublar menga qo'pol qilib aytganda, tiiiiitttt. Uzr yana bir bor. Ammo haqiqatdan ham, qanday qilib o'zimizni futbolni bilmasdan turib xorij klublarini deb urishaveramiz? Ular halolda desangiz men kulgan bo'laman, chunki ularni biz shunchaki yuzaki ko'ramiz, aslida futbol hamma erda bir xil. Biz faqat uni dasturxonga chiroyli qilib tortishni bilmayapmiz xolos. 

Stadionda quruvchilar huddi lego yig'ayotgandek, temir tersaklardan tribunalarni qurib yotibdilar. Bu yangi va hamyonbop texnologiya bo'lib, katta bo'lmagan harajat bilan, quruq erda 50/60 ming nafar kishi sig'adigan arenani qisqa fursat ichida qurish demakdir. Faqat VIP, echinish xonalari, bazi bo'limlar hamda maydonni ideal holatga keltirib qo'ysangiz bo'ldi. 

Aynan 30 dekabrda bu ikki grand klubni Dubayga kelishini ortidan katta pul yotibdi. Avvalo bundan tashkilotchilar mo'may daromad olishadi. Mamlakatga aynan shu o'yinni ko'rish uchun kamida 10 000 nafardan ko'p turist keladi, tabiiyki ular yo'l-yo'lakay yangi yil bayramini BAAda nishonlab ketishadi. Angliya chempionatini inobatga olmaganda, huvillab qolgan TV uchun bu o'ljaning o'zi. Tashkilotchilar istagan narxlarida ularga o'yinni sotishadi. Hullas, evropaliklar ham xursand, tashkilotchilar ham. Bu erda muxlislarga mazza.

Dubayda mazzami deysizmi? Xoh ishoning, xoh ishonmang, "charchuxa". Ikki mahal mashug'lot o'tkazilyapti, jamoa bilan birga yurganligim uchun, mashg'ulotlarda ishtirok etyapman. Hamma harakatingizga vaqtni taqsimlay olishingiz kerak, huddi futbolchi 90 daqiqa uchun o'zining jismoniy holatini taqsimlay olgani kabi. Ikki mashg'ulot o'rtasida, intervyu, fotomaqola va kundalik yozish kerak. Yotish oldidan operator Jamol aka bilan 30 daqiqa trenajer zalida shug'ullanamiz. Jurnalist biron narsani yozishdan avval, o'sha yozayotgan qahramonini o'rniga o'zini qo'yib ko'rishini lozim deb o'ylayman. SHundagina maqola tabiiy chiqadi, shundagina savollaringizga murabbiy va futbolchilar kulib emas, jiddiy javob beradi. Hozircha ishlarimiz BESH, davom etamiz....

Nodirxo'ja Yuldashev