JCH saralash. Osiyo. Navbatdagi turga 3 kun qoldi

11 noyabr kuni 5-tur uchrashuvlari o'tkazilsa, 16 noyabrda 6-tur bahslari bo'lib o'tadi. SHunda biz ushbu oyda jami 12ta o'yin guvohiga aylanamiz. 

"A" guruhidagi vaziyat

Ushbu guruhda Eron terma jamoasi 10 ochko bilan peshqadamlik qilyapti. Forslar 4ta o'yindan uchtasida g'alaba qozonib, bir bor durang o'ynashdi.  Ikkinchi o'rindagi Janubiy Koreya hisobida esa 8 ochko bor. 

5-tur uchrashuvlari. 11 noyabr

Janubiy Koreya - BAA

Iroq - Suriya

Livan - Eron

Janubiy Koreya navbatdagi turni o'z maydonida o'tkazadi. Ular hali g'alaba qozonmagan BAAni qabul qilishadi. Agar BAA yana g'alaba qozona olmasa, unda bu jamoa jahon chempionatiga chiqish orzusi bilan xayrlashsa ham bo'laveradi. Guruhda oxirgi o'rinlarni egallab turgan Iroq va Suriya Qatar poytaxti Dohada o'zaro hisob-kitob ishlarini olib borsa, Eron safarda Livan mehmoni bo'ladi. 

"B" guruhidagi vaziyat

Bu guruhda Saudiya Arabistoni terma jamoasi 12 ochko bilan peshqadamlik qilyapti. 4ta o'yinda 4ta g'alaba. Avstraliya esa 9 ochko bilan ikkinchi o'rinni egallab turgan bo'lsa, keyingi o'yinlarda borayotgan Ummon va Yaponiya hisobida bir xil 6 ochkodan bor. 

5-tur uchrashuvlari. 11 noyabr

Avstraliya - Saudiya Arabistoni

Vetnam - Yaponiya

Xitoy - Ummon

Ushbu turda bizni "dahshatli" to'qnashuv kutmoqda. Negaki hali mag'lubiyatga uchramagan Yaponiya "kengurular" yurtiga safar qiladi. Bungacha to'rtta o'yindan uchtasini o'z maydonida o'tkazgan Saudiya mana endi jiddiy sinovdan o'tadi. Albatta, Avstraliya o'z maydonida faqat g'alabani ko'zlab to'p tepishi aniq, negaki ortda Yaponiya quvib kelyapti. Lekin saudiyaliklar ham qarab turmasa kerak. 

Yaponiya terma jamoasi 11 noyabr kuni hamma o'yinlarda mag'lubiyatga uchrayotgan Vetnam maydonida o'ynaydi. Xitoy esa mezbon sifatida Ummon bilan o'ynaydi. Mezbon sifatida deganimiz boisi, uchrashuv SHarjada o'tkaziladi.