Javohir Rasulov: “G'alabali seriyani davom ettirmoqchimiz”

-  Derbiga yuqori kayfiyatda etib kelgandik. Maydonga raqibni mag'lub etishga ishongan holda tushgandik va vazifani uddaladik. “Qo'qon-1912” jamoasini jamoaviy o'yin hisobiga taslim qildik deb o'ylayman. Aytish kerakki, derbida “Neftchi” Qo'qon jamoasiga qaraganda kuchliroq o'ynadi. O'tgan yili qo'qonliklar bizni o'z uyimizda mag'lub etishgandi. SHu sababli ham bellashuvda g'alaba uchun jiddiy kurash olib bordik. Albatta g'alaba qozonganimizdan juda xursandman. Bizni oldinda oson bo'lmagan bahslar kutib turibdi. Mazkur uchrashuvlarda ham g'alaba qozonib, muvaffaqiyatli seriyani davom ettirmoqchimiz. SHu o'rinda bizni “Istiqlol” stadionida qo'llab-quvvatlab turgan muxlislarga katta rahmat aytmoqchiman. Ularning daldasi biz uchun har doim muhimdir.

Raqib haqida ham yomon fikrda emasman. “Qo'qon-1912” jamoasi “Neftchi” maydonidan ochko olib ketish uchun jiddiy kurashdi. Raqib safidagi Otabek Haydarov va Otabek Zokirov kabi yuqori saviyadagi futbolchilar borligini aytib o'tishim mumkin. SHuningdek, Abdulloh Olimov bahs davomida jamoamiz etakchisi Mansur Saidovga yaqqol bog'lanib o'ynadi va shu sababli ko'plab vaziyatlarda hujum tashkil qilishda muammoga duch keldik. “Qo'qon-1912” -  yaxshi  jamoa. Ularga faqat biroz omad etishmayapti.  Qo'qon shahri klubiga keyingi bahslarda omad tilab qolaman, - deb fikrlarini yakunladi Javohir Rasulov.

Eslatib o'tamiz, Oliy liga 11-tur doirasidagi “Neftchi” – “Qo'qon-1912” o'yinida maydon egalari SHukurali Po'latovning ikki to'pi evaziga g'alaba qozonishdi.

“Neftchi” matbuot xizmati