Jamshid Saidov kubokdagi yirik mag'lubiyatdan so'ng: "Asosiy maqsadimiz chempionat o'yinlariga qaratilgan"

O'yin haqida

- Nima ham deyishim mumkin? Bugun ikkinchi tarkibimiz bilan o'ynadik. "Andijon" kuchli tarkibi bilan maydonga chiqdi va ustunlikka ega bo'ldi. Yigitlar yomon o'yin ko'rsatishmadi, harakat qilishdi. Kubok o'yinlarida asosan yoshlar tarkibi bilan harakat qildik. Asosiy kuch va etibor chempionat o'yinlariga qaratiladi, chunki Superligadagi hozirgi natijalarimiz bizni qoniqtirmayapti. Divanda yonboshlab post yozadigan tahlilchilar ikkinchi tarkib bilan o'ynashimiz borasida ko'p gapirishdi. Biz mavjud imkoniyatlarimizdan kelib chiqqan holda harakat qilayapmiz. Yosh futbolchilarda xatolar kuzatiladi, bu tabiiy hol. Bugun ham ayrim vaziyatlarda futbolchilarga tajriba etishmadi. Umumiy aytsam, yomon o'ynamadi yigitlar. Minnatdorchilik bildiraman bugungi o'yin uchun. 

- Jamoangiz bugun yoshlar tarkibiga ishonch bildirganiga sabab nima?

- Aytib o'tdim, biz kubok o'yinlarida asosan yoshlar va o'yin amaliyoti kam futbolchilarga imkoniyat berdik. CHunki asosiy maqsadimiz chempionat o'yinlariga qaratilgan. Guruh bosqichidan boshlab biz shu yo'nalishda ishladik. Superliga ikkinchi davrasi yanada og'ir va qiyin o'tishiga shubha yo'q.

- Rahbariyat kubok o'yinlarida vazifa qo'ymaganini aytayapsiz. Muxlislar hurmati uchun ham bugun asosiy tarkib maydonga tushirilsa bo'lmasmidi? 

- Takror aytaman, biz hozir mavjud imkoniyatdan kelib chiqib harakat qildik. Hech qaysi murabbiy maydonga yutqazish uchun tushmaydi. Yosh futbolchilar, o'yin amaliyoti kam bo'lgan futbolchilarga o'zlarini ko'rsatish uchun imkoniyat berdik. Yutib qo'ysak, boshqacha fikrlar yangrashi aniq edi. Yigitlar harakat qilishdi, lekin ozroq mahorat etishmadi.