Ixtiyor Karimov: “Muxlislarimiz yordamiga ishonamiz”

Jumladan “Oq bo'rilar” jamoasida bosh murabbiy vazifasini vaqtinchalik bajarayotgan Ixtiyor Karimovning fikrlari quyidagicha bo'ldi: 

"Eng birinchi galda, barcha jamoalarga bo'lgani kabi, “Olmaliq”ga nisbatan ham o'z hurmatimizni bildirib qolamiz. Jamoa mamlakat futbolida o'z o'rni, obro'si va mavqeiga ega. 

Biz bilan olmaliqliklar o'rtasida hozirgi kunga qadar kechgan barcha bahslar keskin va qizqarli kurashlar ostida, jangovor ruhda o'tgan. Eng muhimi muxlislar zavq olishgan. O'ylaymanki, bu ikki jamoaning bugungi “to'qnashuvi” ham xuddi avvalgi yillardagi scenariy kabi o'tadi. 

Natija haqida gapiradigan bo'lsam, barcha birdek ijobiy natija uchun harakat qiladi. Omad va uning ortidan keladigan g'alaba kuchlilarga kulib boqadi. 

G'uzorda, o'z muxlislarimiz ko'z o'ngida, ularning qo'llab-quvvatlashlari ostida to'p surishimiz jamoamizga o'zgacha kuch bag'ishlaydi. Aynan mana shu kuch, dalda yutug'imiz yo'lida muhim ahamiyat kasb etadi. Biz muxlislarimizga ishonamiz, ular esa bizga. Ishonchni oqlash uchun esa bor kuchimizni faqat g'alaba qozonishga qaratamiz. 

Tarkibda hech qanday muammo yo'q. SHogirdlarim bugungi uchrashuvga jangovor holda, g'alaba ishtyoqida shay holatda turishibdi. Ayniqsa, jismoniy tarafdan ishlarimiz ko'ngildagidek bormoqda. Xabaringiz bor, yaqinda murabbiylar guruhimizga tajribali mutaxassis, Osiyo futbol Konfederaciyasining murabbiylarni o'qitish bo'yicha amaldagi instruktori, jismoniy tayyorgarlik bo'yicha bir qator xalqaro kurslar ishtirokchisi Zoir Hasanov kelib qo'shildi. U bundan buyon “SHo'rtan”da futbolchilarimizning jismoniy tayyorgarligiga masul sifatida ish olib boradi" - deydi Ixtiyor Karimov.

“SHo'rtan” PFK matbuot xizmati