Intervyu. Umar Adhamzoda: "Biz bitta oila edik. Men "Neftchi" muxlisi bo'lib qolaman"

Farg'onaliklar safidagi ajoyib o'yinlari bilan ko'pchilikning etiborini tortgan Umar Adhamzoda faoliyatini poytaxt bilan bog'lashga qaror qildi. Mazkur mavzu yuzasidan futbolchi bilan suhbatlashdik. 

- Umar, keling dastlab futbolga kirib kelishingiz tarixi bilan o'rtoqlashsangiz. Ko'pchilik sizni "Lokomotiv" tarbiyalanuvchisi, deb o'ylaydi. "Neftchi"gacha bosib o'tgan yo'lingiz haqida gapirib bering...

- Futbolga kirib kelishim haqida gapiradigan bo'lsam, Toshkentdagi CHilonzor tumanida "Paxtakor"ga qarashli filialida ilk qadamlarni tashlaganman. 

- Birinchi murabbiyingiz kim bo'lgan? Qaysi murabbiylardan qanday xislatlarni olgansiz?

- U erda Abdusattor Rahimov qo'l ostida 1 yildan ko'proq vaqt davomida shug'ullandim. So'ng "Paxtakor" akademiyasiga yo'l olganman. Akademiyada Linur Irkinovichdan futbol sir-asrorlarini o'rganganman. 2017 yilda "Lokomotiv"ning ikkinchi ligadagi jamoasiga jalb qilishdi. Yuriy Yurevich qo'l ostida yarim yil o'ynaganimdan so'ng Vazgen Ignatevich boshchiligidagi o'rinbosarlar tarkibiga o'tdim. Katta futbolga kirib kelishimda ushbu murabbiyning hissasi katta bo'lgan. 2019 yil boshida Timur Kapadze bilan ham ishlashga muvaffaq bo'ldim va ikkinchi davrada Farg'onaning "Istiqlol" jamoasida ijara asosida to'p tepdim. SHundan so'ng ayrim sabablarga ko'ra, "Lokomotiv" bilan xayrlashdim, deya olaman. 

- "Neftchi"ga kelib qolishingiz qanday bo'lgan?

- "Istiqlol" moliyaviy sabablarga ko'ra yopildi. Bu paytda esa "Neftchi"dan taklif kelib tushdi. Deyarli 3,5 yilni shu jamoada o'tkazganimdan baxtiyorman, chunki "Neftchi" o'zbek futbolida o'z o'rniga ega klub.

- 2019 yil "Lokomotiv"da Kapadze bilan qisqa vaqt ichida ishlash qanchalik foydali bo'lgan?

- Kapadze har bir mashg'ulotga yangi g'oyalar bilan kelardi. SHunchaki ajoyib edi. Uning boshchiligida ko'pchiligimiz o'sishga erishdik. 

- "Neftchi"dagi birinchi mavsumingiz muvaffaqiyatsiz kechgandi. Xususan, 2020 yil "Turon" bilan kechgan "jang"da imkoniyat boy berildi. O'sha pallada ichingizdan nimalar o'tgan?

- O'sha mavsum "Neftchi" uchun og'ir o'tgan. "Turon" bilan o'yinda barchasi o'z qo'limizda edi. Superligaga bir qadam qolgandi. Bir lahzada barchasi o'zgarib ketgan. Demak nasib qilmagan ekan.  

- Vitaliy Levchenkoga qanday tarif berasiz? Ushbu mutaxassis jamoani o'zgartira oldimi?

- Vitaliy Levchenko bilan 1,5 yil ajoyib o'tdi. O'zining qarashlariga, uslubiga ega mutaxassis. SHuni aytishim kerakki, jamoani bir oilaga aylantira oldi. Talabchan murabbiy. Albatta men ham, klub ham ijobiy manoda o'sishga erisha oldi. Buni natijalar yildan-yilga yaxshilanib borayotganidan sezish qiyin emas. 

- "Paxtakor" taklifi haqida...

- Mavsum yakunlanganidan so'ng ko'plab takliflar bor edi. "Paxtakor" bu jamoalar orasida oldiga yuqori maqsad qo'ygani bilan ajralib turdi. Faoliyatimda yanada o'sishga erishish uchun ham "Paxtakor" taklifida to'xtaldim. 4 yilga yaqin vaqt davomida oilamdan uzoqda bo'ldim. "Neftchi"ni tark etish qiyin edi. Biz bir oila edik. Oiladan ketish doim oson bo'lmagan. Men har doim "Neftchi" muxlisi bo'lib qolaman.