Intervyu. Komil SHarafutdinov: “Dinamo“ Pro-liga uchun yig'ilgan tarkib bilan Superligada natija ko'rsatishga majbur bo'ldi”

O'tgan mavsum yakunlariga ko'ra Superligadan tushib ketgan Samarqandning “Dinamo” jamoasi ham Toshkentda mashg'ulotlarni davom ettirmoqda. Kecha yig'in doirasidan o'rin olgan navbatdagi nazorat uchrashuvi o'tkazildi. Poytaxtning “Rubin” jamoasi esa raqib vazifasini bajardi. Belashshuv yakuniga etgandan keyin bir necha yildan beri samarqandliklar sharafini himoya qilib kelayotgan Komil SHarafutdinovni suhbatga chorladik.

- Buyuk o'tmishga ega, minglab muxlislar qalbidan joy olgan “Dinamo” afsuski quyi ligaga tushib ketdi. Mazkur hodisaga hamma turlicha munosabat bildirmoqda. Jamoa azosi, uning ichidagi inson sifatida qanday izoh bera olasiz?
- Mavsumni yaxshi va ijrobiy natijalar bilan boshlagandik. Birinchi davrani ko'ngildagidek o'tkazdik. O'yinimiz ko'pchilikka manzur kelgan paytlar ham bo'ldi. O'z maydonimizda deyarli mag'lub bo'lmadik. Ha, faqat davra ohirida “Bunyodkor” bilan yaxshi o'ynab uch ochko yo'qotdik. Durang natijaga yaqin kelgandik. Ikkinchi davrada jamoamizdan omad yuz o'girdi. SHuningdek, ayrim bahslarda tajriba etishmadi.

- SHaxsan o'zimga jamoadagi futbolchilar maydonda maqsadsiz va motivaciyasiz harakat qilgani sezildi. Balki, hamma narsa maosh va mukofot pullari bilan bog'liqdir?
- Jamoadagi ichki muhitda muammo bo'lmadi. Hammamiz bir oiladek bellashuvlarga hozirlik ko'rdik. Afsuski, o'yinimiz o'zimiz o'ylagandek chiqmadi. Moliyaviy tomonlama deyarli kamchilik kuzatilmadi hisob. Natijalarimiz qoniqarsiz ko'rinish olgani tufayli biroz muammo yuzaga kelgandir.

- “Dinamo”ning kutilmaganda elitada paydo bo'lib qolgani ham pand berdimi? Reja bo'yicha, bosqichma-bosqich ish qilinganida vaziyat boshqacha tus olarmidi...
- Bu gapingizga qo'shilaman. Aslida tayyorgarlik, tarkibdagi futbolchilar va jamoa Pro Liga uchun shakllantirilgandi. To'satdan kutilmagan qaror bizni shoshiltirib qo'ydi. Quyi liga uchun yig'ilgan tarkib bilan Superligada natija ko'rsatishga majbur bo'ldik.

- Akangiz Dilshod SHarafutdinov faoliyatini ohirgi qismlarini xorijda o'tkazganidan xabarimiz bor. Hozirda nima bilan band?
- Jamoamizda yordamchi murabbiy sifatida faoliyat olib bormoqdalar.

- Faoliyatingizda burilish yoki o'zgarish qilishga imkon bo'lganmi? Boshqa jamoalardan takliflar oldingizmi?
- Klub bilan tuzgan shartnomam yakuniga etgani yo'q. Hozircha jamoamga kerak ekanman, Samarqand xalqi uchun o'ynashda davom etaman.

- Toshkentdagi yig'in qay tartibda davom etmoqda? Murabbiylar shtabi va futbolchilar o'rtasida aloqalar qanday?
- Yig'in alo kayfiyatda o'tmoqda. Toshkentda ko'plab jamoalar bilan nazorat o'yinlaridan ishtirok etmoqdamiz. Ko'rikdan o'tayotgan yosh futbolchilar Tajmurod Agamurodovda yaxshi taasurot qoldirmoqda. Ushbu inson tajribali mutaxassis hisoblanadi. Mashg'ulotlarda o'zini ko'rsatganlarni yaxshi ko'radi. O'z ishiga talabchan. Fursatdan foydalanib muxlislardan jamoamizni doim qo'llab-quvvatlashlarini so'rab qolaman. Ularning ko'magi ostida ijobiy natijalarga erishamiz. Ishqibozlar bilan aka-ukadekmiz. Dalda berishdan charchashmaydi.


Abdulaziz Iskandarov suhbatlashdi