Ilhom SHaripov: "Ketma-ket 6 g'alaba "Dinamo"ning o'yini sekin-asta shakllanayotganligini ko'rsatmoqda"

- O'yin borasida to'xtalsangiz?

- Uchrashuv tizigini bizning nazoratimiz ostida o'tdi va yakunda g'alabani qo'lga kiritdik. Tezkor kiritilgan dastlabki ikki goldan keyin yigitlar ozroq xotirjamlikka berilishgani uchun jazolandik. Dastlab rikoshet tufayli o'z darvozamizdan to'p olib chiqqan bo'lsak, ikkinchi bo'lim boshida qarshi hujumda himoyada xatoga yo'l qo'yganimiz ikkinchi marta darvozamiz ishg'ol etilishiga sabab bo'ldi. Qilingan o'zgarishlardan keyin jamoa o'z irodasini namoyish etib yana hujumkorlikka zo'r berdi va niyatimizga etishdik. SHukurki, jamoamiz o'yin so'nggigacha o'z kuchiga ishonmoqda va bu yakunda g'alabalarimizni taminlayapti.

- Ko'riniyaptiki, jamoa o'yini tobora shakllanmoqda. Bu ish jarayonida ham ko'zga tashlanmoqdami?

- Hammasiga birinchi navbatda vaqt kerak. Falabalarimizning hech biri oson qo'lga kiritilmayapti, har o'yinda kurashib, katta kuch sarflab muvaffaqiyatga erishayapmiz. Ketma-ket olti g'alaba Dinamo o'yini sekin-asta shakllanayotganligini ko'rsatmoqda. Bugungi tarkibda ko'rgan bo'lsangiz, 11 futbolchidan 9 tasi mahalliy yoshlar edi. Zaxiridan maydonga tushirilgan 4 futbolchi ham sekin-asta tarkibga jalb etilayotgan samarqandlik yosh iqtidorlar. Yani, bugun to'p surgan 13 futbolchi mahalliy yosh futbolchilardir. Umid qilamanki, biz o'yindan-o'yinga yanada yaxshiroq ishlashda davom etamiz va nasib qilsa o'z oldimizga qo'yilgan vazifani uddalashga intilamiz.

- Bugun Aleksey Nikolaev maydonga tushmadi. Bu nima bilan bog'liq?

- Afsuski, jarohatlar bizni chetlab o'tmayapti. Oldinroq tajribali hujumchi Alisher Xoliqov jarohat olgan bo'lsa, Paxtakor-2ga qarshi o'yinda Aleksey Nikolaev jarohat oldi. Uning o'rniga to'p surayotgan yoshlarga hali tajriba kamlik qiladi. Nikolaev 10 kunlardan so'ng safga qaytishi lozim.

- NBU-Osiyoga qarshi bahs Dinamoning joriy mavsumdagi eng yaxshi o'yini bo'ldi, deya bildirilgan fikrga qo'shilasizmi?

- Bugungi natijadan kelib chiqib aytilgan bo'lsa, qo'shilaman. Umid qilanmanki, chiroyli va muhim g'alabalarimiz hali oldinda.

Dinamo Matbuot xizmati.