Илҳом Шарипов: “Динамо”нинг кейинги режалари ҳозирча аниқ эмас”

Аммо ҳозирда мухлислар орасида “Динамо”ни бу йил ҳам элитада ўйнаши мумкин деган гап-сўзлар юрибди. Шу ва жамоанинг тайёргалиги бўйича билиш мақсадида клуб менежери Илҳом Шарипов билан суҳбатлашдик.

- Илҳом ака, бугунги кунда Суперлиганинг деярли барча жамоаси янги мавсумга тайёргарликни бошлаб юборди. Хатто ПРО-Лига клублари ҳам ўз қароргоҳида шуғулланаётганини кўрмоқдамиз. Айтингчи “Динамо”нинг бу борадаги режалари қандай?
- Йигитларни 11 январ куни Самарқандда йиғишни режалаштирганмиз. Очиғини айтсам, 15 январдан сўнг жамоанинг кейинги тақдирига тўлиқ ойдинлик киритилади. Унга қадар тайинли гап айтиш қийин.

- Дарвоқе, “Динамо”ни яна Суперлигада иштирок этиши мумкинлиги тўғрисида гап-сўзлар йўқ эмас. Бу борада жамоа менежери сифатида қандай муносабатдасиз?
- Ўзингизга яхши маълумки, ортда қолган чемпионатда жамоамиз сўнгги ўринни эгаллади. Спорт принципларига кўра, “Динамо” Суперлигани тарк этди. Лекин мен ҳам эшитдим, “Динамо”ни яна элитада иштирок этиши мумкин деган миш-мишларни. Воқеалар ривожи қандай кечишини вақт кўрсатади.

- Нега, юқорида 15 январь куни кўп нарсага ойдинлик киритилади деб айтдингиз?
- Шу куни раҳбарият билан учрашамиз ва жамоанинг келажагига аниқлик киритилади.

- Гарчи “Динамо” Суперлигани тарк этган бўлсада, таркибдаги футболчиларни ўз сафига қўшиб олишни истаётгани клублар сони кўп эканлигини эшитмоқдамиз.
- Бу қувонарли албатта. Биласизми биз футболчилар билан икки йиллик шартнома имзолаганмиз. Шу боис уларнинг бошқа клубга кўчиб ўтиши кўпроқ “Динамо”га боғлиқ.

- Агарда “Динамо” жорий мавсумни ПРО-Лигада ўтказадиган бўлса, таркибдаги маҳоратли футболчилар Суперлига клубларига бериб юбориладими ёки олиб қолинадими?
- Таркибни бош мураббий аниқлайди. Чунки натижага у жавобгар. Шу боис бу борада Тачмурод Агамуродовнинг қарорини хурмат қиламиз.