Ilhom Mo'minjonov: "Darvozabonlar haqida hadeb gapiraverish ham noto'g'ri"

O'yin haqida

- Bugungi natijaga har doimgidek bosh murabbiy sifatida o'zim  aybdorman. Rahbariyat bizga barcha sharoitlarni yaratib bermoqda. Futbolchilarni o'zim jamlaganman. Ishlashda davom etamiz, lekin klubimiz rahbariyati va muxlislarimizdan uzr so'rayman. Natijaga o'zim aybdorman. 

- Zaxirada faqat 6 futbolchi bor edi. Buning sababi nima?

- Hozirgi kunda bizda jami 7 nafar yo'qotish bor. Qaydnomada darvozabonlar bilan qo'shib hisoblasa 18 ta futbolchimiz bor edi. Jarohatlar haqida aytsam, bahonaga o'xshab qoladi. SHu sabab bu haqida indamay turgandim. Bor imkoniyatdan kelib chiqib harakat qilayapmiz.

- O'yin davomida ko'rindi, jamoada qandaydir parokandalik bordek. Umuman aytganda, o'zi klub tizimida ham parokandalik bormi?

- Bugun jangovor o'yin o'tkazdik. Birinchi bo'limdan so'ng yigitlarga xatolari haqida tushuntirdim. Ikkinchi bo'limda maydonga chiqib 11 daqiqa yaxshi o'ynadik. Goldan keyin jami 33 daqiqa "Bunyodkor" o'ynadi. Futbolchilarimiz himoyada xato qilishdi, ayrimlar o'z poziciyalarini yo'qotishdi. Raqibga uzoq masofadan zarba yo'llashga imkon berib qo'ydik. 2 ta gol jamoamizni sindirdi. Bizda goldan so'ng futbolchilarning o'ziga kelishi qiyin bo'layapti. O'yin oxirida qizil kartochka ham oldik. SHuningdek, Abror Ismoilovning muxlislar tomon amalga oshirgan ishi juda xunuk xolat, bu uchun jamoamiz nomidan uzr so'rayman. Bu masalada o'zi bilan gaplashdik, noto'g'ri ish qilganini anglab etdi. 

- O'tkazilgan gollarda darvozabonning aybi bor deb hisoblaysizmi?

- Darvozabonlar haqida gapiraverish ham noto'g'ri. Avvalgi o'yinda ham darvozabon xatosi haqida gapirilgandi. Qaytarsa bo'lardi, lekin raqibga tepish imkonini berdik, demak himoyamiz ham kuchsiz. Bularni ustida ishlaymiz. Zaxira o'rindig'imiz hozirda juda tor. Bu chuqurlikdan chiqib ketishimiz kerak.

Futbolchini murabbiy yaqinroq biladi. Kimning tezligi qanday, kim o'yinga tayyor xolatda. Bugungi o'yindan so'ng futbolchilar bilan gaplashib oldik. Endi "Dinamo" bilan safarda bo'ladigan o'yinga jiddiy tayyorgarlik ko'ramiz. 

- Mavsum avvalida rahbariyat kuchli uchlik vazifasi qo'yganini aytgandingiz. Agar rahbariyat qoniqarsiz natijalar tufayli istefongizni so'rasa, bu haqida qanday javob bermoqchisiz?

- Rahbariyat bizga barcha sharoitlarni yaratib bergan. Qoniqarsiz natijalar uchun uzr so'rayman. Jamoa 3 yil deganda endi Superligaga chiqdi. Muxlislardan ham uzr so'rayman. Jamoaga oid har bir harakatni rahbariyat hal qiladi.

- Zaxira o'rindig'i tor bo'lsa, yoshlar jamoalaridan futbolchi jalb qilinsa bo'lmaydimi?

- Bo'ladi, albatta. Biz hozir bu haqida ham o'rganib chiqayapmiz. Bizga hozir natija va natija beradigan o'yinchi kerak. Sizlar gapiraverasizlar, olinglar deb. Hozir SHerzod Karimov haqida so'rashdi, kim qanaqa tayyor ekanini murabbiy yaxshiroq biladi. Har bir mashg'ulotimizda U-21 va U-19 jamoalarimizdan futbolchilar qatnashishadi. Sekin-sekin ularni tarkibga jalb etib boramiz. Qaerda ishlagan bo'lsam, bunday bosqichlardan o'tganman.

- Qizil kartochka haqida fikringiz qanday?

- Bor edi. Hakamning yoniga borganimda bu haqida izoh berdi.