Ildar Sakaev: "Mag'lubiyat uchun barcha aybni o'z zimmamga olaman"

O'yin haqida

- Mag'lubiyatga hamisha murabbiy aybdor bo'ladi. Bugun men yutqazdim. Qolgan jihatlarni jamoa ichkarisida hal qilamiz. Bugungi mag'lubiyat uchun hech kimni ayblamagan bo'lardim. Barcha aybni o'z zimmamga olaman.

- Ulug'bek Xudoyberdievga ko'rsatilgan qizil kartochkaga munosabatingiz?
- Bunga hakamlar qo'mitasi baho beradi. Men hozir bu haqida aytishim noto'g'ri. Aytishim mumkin, har bir jamoaga futbol o'ynash uchun imkoniyat yaratib berilishi kerak. Bugungi o'yinda yigitlar borini berib o'ynashdi, lekin hakamlar har ikki jamoaga oxirigacha o'ynash imkonini berishmadi.

- Jamoa o'tgan o'yinda ham, bugun ham 80-daqiqadan keyin gol o'tkazib yubordi. Bu jismoniy tayyorgarlik bilan bog'liqmi?
- Men bunday deb aytmagan bo'lardim. Samarqandda ham, bugun ham hushyorlikni yo'qotib qo'yganimiz evaziga gollar o'tkazdik. O'sha o'yinda samarqandliklar omad evaziga yutib ketishdi. Bugun qizil kartochkadan so'ng o'yinimizni yo'qotdik. SHaxsiy fikrimcha, bu vaziyatda qizil kartochka yo'q edi. Albatta bu mening qarashim, vaziyatni tahlil qiladigan hakamlar qo'mitasi bor.

"Yangier" jamoasi tarkibiga jalb etilgan barcha futbolchilarga ishonishda davom etamiz. Ular mavsum davomida yanada kuchayib borishadi.

"Neftchi" kurashuvchan jamoa, bugun ular agressiv o'yin ko'rsatishdi. Gollarni xatolar va hushyorlikni yo'qotib qo'yganimiz evaziga o'tkazib yubordik.

PRO-Ligada raqobatchi jamoalar ko'p, deyarli barcha jamoalar bir xil darajada. Maksimal natija qilish juda ham qiyin. Ushbu chempionatning saviyasi yildan-yilga ortib bormoqda.