Igor SHkvirin: "Ikki marta hisobda oldinga chiqib g'alaba qozona olmadik"

O'yin haqida
- Uchrashuv keskin kurashlarga boy tarzda kechdi, ikki jamoa futbolchilariga ham ko'p marta sariq kartochka ko'rsatildi. Yakuniy natija haqida gapiradigan bo'lsam, o'yin tugashiga sanoqli daqiqalar qolganida to'p o'tkazib yubordik. Bu esa juda alam qildi, chunki ikki ochkoni boy berdik. Lekin ikkinchi tomondan "Lokomotiv" bizga nisbatan ko'p hujum uyushtirdi va shu tomondan olib qaraganda bir ochko ishladik. Ammo ikki marta hisobda oldinga chiqib, yakunda g'alaba qozona olmadik.

Ustunlikni raqibga berish haqida
- Bu ko'proq o'yinchilarning psixologiyasi bilan bog'liq. Qanot o'yinchilarimiz doim ham faollik ko'rsata olmadi. SHuningdek, markaziy yarim himoyachilarimiz ham ko'p bora to'pni yo'qotib qo'yishdi.

Himoyachilar haqida
- Tan olaman, himoyada xatolarimiz bor va ularni to'g'rilash ustida ish olib boryapmiz. Davralar oralig'ida yaxshi himoyachi olishni mo'ljalllab turibmiz. Safimizda Gogol bor, lekin u ikki marta qizil kartochka olishga ulgurdi. Ammo uni yaxshi himoyachi deya olaman.