Ibrohim Ibragimov: "Olimpiada yo'llanmasi uchun tayyorgarlikni davom ettiramiz"

- Osiyo o'yinlari musobaqasi haqida fikrlaringiz?

- Bu turnir biz uchun foydali bo'ldi deb ayta olaman. Har bir o'yin qiziqarli va o'ziga yarasha qiyin o'tdi. Gonkong bilan musobaqa davomida uch marotaba o'yin o'tkazdik, bunaqasi kamdan-kam bo'ladi albatta. Bu jamoa ham musobaqaga yaxshi tayyorgarlik ko'rib kelgan ekan. Bundan tashqari Indoneziya va Saudiya Arabistoni bilan ham yaxshi o'yin o'tkazdik.

- Yarim finalda Janubiy Koreyani mag'lub etish uchun nima etishmadi deb o'ylaysiz?

- Yarim final bahsida Janubiy Koreya bilan ham yomon o'ynamadik. Jamoamiz finalga chiqish uchun bor kuchi bilan harakat qildi. Musobaqa avvalida Xitoyga chempionlikni maqsad qilib borgan edik. Yarim finalda o'zimizning xatolar sabab gol o'tkazdik, bu biz uchun katta dars bo'ldi.

- Bronza medali uchun o'tgan bahs haqida nimalar deya olasiz?

- Ushbu uchrashuv avvalidagi kuchli shamol va yomg'ir birinchi bo'limda o'zimizning taktik futbolni ko'rsatishga biroz qiyinchilik tug'dirdi. Taym so'ngida gol kiritib, birinchi bo'limni g'alaba bilan yakunlaganimiz bizga qo'l keldi. Ikkinchi bo'limda murabbiylar shtabining ko'rsatmalariga amal qilib uchta gol urishga erishdik.

Musobaqa davomida bizga muxlislik qilgan barcha yurtdoshlarimizga rahmat aytaman. O'tgan yilgi Osiyo kubogida ikkinchi o'rin, bu safargi Osiyo o'yinlarida uchinchi o'rinni qo'lga kiritdik. Osiyoda tengdoshlarimiz orasida faqatgina chempionlikni qo'lga kiritish qoldi. O'z ustimizda yanada ko'proq ishlab, xatolardan kerakli hulosa qilgan holda asosiy maqsadimiz bo'lgan 2024 yilgi Olimpiada o'yinlariga yo'llanma beradigan Osiyo kubogi musobaqalariga tayyorgarlikni davom ettiramiz.