Vitaliy Levchenko: "G'alabaga biz yaqinroq edik. Adhamzoda bu kabi vaziyatlardan har safar foydalanganda, hozir u "Real"da bo'lardi"

- O'yin haqida

- Bugun Farg'onada haqiqiy futbol bayrami bo'ldi. O'yinchilarim uyaltirib qo'yishmadi. Tomoshabop, yorqin o'yin bo'ldi. Bayram, derbi o'z nomini oqladi, ammo gol bo'lmadi. 

- Qoldirilgan o'yin sabab ketma-ket ikki marta peshqadamlarga qarshi o'ynashga to'g'ri kelib qolmoqda. Bunga qanday qaraysiz?

- O'ylaymanki, raqibga ham oson bo'lmadi. Keyingi o'yinda ham chempionlik uchun kurashayotgan jamoaga qarshi o'ynaymiz. Ularga ham oson bo'lmaydi. "Nasaf" ham g'alaba uchun maydonga tushadi.

- Umar Adhamzodaning oxirgi daqiqalardagi vaziyati haqida...

- Agar u bu kabi vaziyatlardan har safar gol urganda, hozir "Real Madrid" yoki boshqa jamoada o'ynayotgan bo'lardi. Ha, realizaciya masalasi oqsamoqda. Bunday vaziyatlardan foydalanish futbolchiga bog'liq. Ustida ishlash kerak bo'lgan ishlar bor. Keyingi turlarda futbolchilarimga omad tilayman.

- Birinchi davra deyarli yakunlandi. CHempionlikka davogar jamoalarning imkoniyatlarini qanday baholaysiz?

- Hozir chempionat qiziqarli tus olmoqda. Qaysidir jamoani malum uchrashuvda uch ochko olishini tahmin qilish qiyin. Jamoalar darajasi deyarli teng. Aynan shunisi bilan chempionat qiziqarli bo'lmoqda. Daraja, qarshilik kuchayib bormoqda. Ikkinchi davra qiziqarli bo'lishi aniq. CHempionlik uchun 4 yoki 5 jamoa kurashishi mumkin. Oltin medal uchun kurashadigan jamoalar qanchalik ko'p bo'lsa, daraja ham oshadi. Hamma ham chempionlikka erishmaydi, ammo raqobat yaxshi bo'ladi. Nimanidir tahmin qilish juda qiyin.

- "Neftchi" birinchi davrada barcha kuchli jamoalar bilan uyda o'ynadi. Ikkinchi davrada klubga qiyin bo'lmaydimi?

- Qiyin bo'lishi aniq. Bugun ham ko'rdingiz, qanday bosim bo'lganini. Menimcha, g'alabaga biz yaqinroq edik, lekin mahorat etishmadi. Asosiysi, chempionatda intriga bor. Uydami, safardami taktika va strategiyani to'g'ri tanlash kerak.

-  "Navbahor" bu yil OCHL saralashida ishtirok etadi. Jamoaning o'yinidan kelib chiqib, "Navbahor"ning imkoniyatlarini qanday baholaysiz?

- Bu "Navbahor" qaysi guruhga tushishiga bog'liq. Transfer boziriga qarasangiz, Saudiya Arabistoni klublari aql bovar qilmas transferlarni amalga oshirishmoqda. "Navbahor"ga  Saudiya Arabistoni klublaridan biri raqiblik qilsa, anchagina qiyin bo'ladi. Guruhga teng raqiblar to'plansa, "Navbahor" natija qilishi mumkin. Barcha o'zbek jamoalari guruhdan chiqishlariga umid qilaman.

- Bugun uchrashuvni 19 mingdan ortiq tomoshabin bevosita stadiondan turib tomosha qildi. Farg'onaga futbol bayramini qaytara olgan mutaxassis sifatida muxlislarga qanday tilaklaringiz bor?

- Murabbiy sifatida har bir o'yinda shunaqa muxlislikni ko'rgim keladi. Muxlislarimiz har bir o'yinga shunday keladigan bo'lishsa, shaxsan o'zim baxtli bo'lar edim. CHunki, bu qo'shimcha adrenalin. Murabbiy sifatida menga bu juda yoqimli bo'lardi.

- Bugun Larin himoyada bo'lganda, u o'yinni kuchaytirish mumkinmidi?

- Bizda raqobat bor. 22 futbolchimiz bor. Ularning imkoniyati deyarli teng. Hamma o'yinchilar 90 daqiqadan o'ynashsa, baribir bazi paytlarda ularda tushish bo'ladi. Bundan qochib bo'lmaydi. Biz murabbiy sifatida shuni nazorat qilamiz. Catapult ko'rsatkichlariga ko'ra bugun biz Larinning holatiga 100% ishona olmasdik. O'yinga Anvar tushdi va sifatli futbol ko'rsatdi. Bu raqobat deb ataladi.