Fevzi Davletov: "Menga nisbatan etirozlar? Muxlislar doimo jamoaga ishonishi kerak"

- Bugun muxlislar yaxshi, jangovar o'yin tomosha qilishdi, deb o'ylayman. Ikkala jamoa ham g'alaba qozonishni istadi. Bugungi holatda biz g'alabaga yaqinroq edik va adolatli g'alabaga erishdik. Barchani, muxlislarni, yigitlarimni tabriklayman. Futbolchilarim barcha ko'rsatmalarni bajarishdi. Birinchi bo'lim yaxshi o'tdi. Qo'pol xatodan keyin o'tkazib yuborilgan gol o'yinni yondirib yubordi. Standartlardan keyin ko'p xatolar qildik. Shundan keyin jamoam oldinga o'tdi va gollar urdi. Raqibni to'g'ri o'rgangandik, ularning qanotlaridan kirib bordik va adolatli gollarni urdik.

- Hisob 1:0 bo'lib turgan paytda ikki qanot himoyachilarini o'zgartirdingiz. 1:1 bo'lganidan keyin esa markaziy himoyachini nega o'zgartirdingiz?

- Nodir Nematxonov kichik jarohat olgandi. Uni almashtirishga majbur bo'ldik. Qanotlar borasida esa shunday deya olaman: biz kuchlarni yangiladik, tezlik qo'shdik. Bu poziciya bo'yicha rejali o'zgarish edi. Bu o'zgarishlar jamoaga yordam berdi.

- "Surxon"dagi faoliyatingiz davomida muxlislarning Sizga nisbatan etirozi ko'p bo'lmoqda. Bugungi g'alabadan keyin muxlislarga nima deya olasiz?

- Bunday o'yinlardan keyin yigitlar barchasi omadsizlik bo'lganini tushunib turishgandi. Muxlislar esa har qanday qiyin o'yin bo'lishidan qatiy nazar jamoani qo'llab-quvvatlashlari, ishonishlari kerak. Shundagina jamoa barcha xatolar to'g'rilanib, o'yin yaxshilanib ketadi.

- Abdusalomov masalasida nima deya olasiz?

- U kasal edi. "Bunyodkor"ga qarshi o'yinni betob holatda o'tkazdi. Uni o'shanda maydonga tushirmasligimiz kerak edi. Biroq uning o'zi maydonga tushishni istadi. U kasal. Shuningdek, Pletnevda ham jarohat bor. Menimcha, navbatdagi o'yinga qadar barcha safga qaytadi va biz jangovar tarkibda o'ynaymiz.