“Faxriylar kubogi” turniri davom etadi. Navbat 50 yoshdan oshganlarga

Bu safar 50 yoshdan oshgan faxriy futbolchilar sovrin uchun kurashadilar.

Vodiy mintaqasida Andijon hamda Namanganlik faxriy futbolchilar turnirda ishtirok etmasliklarini malum qilishdi. Endi final bosiqichiga chiqish uchun kurash faqat Qo'qonlik va Farg'onalik faxriylar o'rtasida bo'lib o'tadi. Bugun Qo'qondagi “Markaziy” stadionida Qo'qonlik hamda Farg'onalik faxriylar o'rtasidagi mintaqaviy saralash uchrashuvi bo'lib o'tdi. Ob-havoning sovuq bo'lishiga qaramay uchrshuv qiziqarli kurashlarga boy tarzda bo'lib o'tdi. Farg'onalik faxriylar safida Salim Zokirov (darvozabon), Rustam Do'rmonov, Zaylobiddin Burxonov, SHuhrat Nazirov, Farhod Ergashev kabi futbol faxriylari maydonga tushishgan bo'lsa, Qo'qonliklar tarkibida Zohid Nurmatov, Azamat Ashurmatov, Jamoliddin Tojiboev, Muhammad SHokirov, Akmal Ortiqov kabi muxlislarga yaxshi tanish bo'lgan faxriy futbolchilar to'p surishdi.

Qiziqarli o'tgan bahs 3-2 hisobidagi Qo'qonliklarning g'alabasi bilan yakun topdi. Qo'qonliklardan gollarni Muhammad SHokirov, Azamat Ashurmatov penaltidan hamda Rustam Tursunovlar kiritishdi. Farg'onalik faxriylar jamoasidan esa SHavkat Ziyaev ikki marta mezbonlar darvozasini ishg'ol qildi.

Endi 24 noyabr kuni Farg'ona shahrida har ikki jamoa ishtirokida javob o'yini bo'lib o'tadi. Ikki o'yin natijasiga ko'ra g'olib bo'lgan jamoa Toshkent shahrida bo'lib o'tadigan “Faxriylar kubogi” turnirining final bosiqichiga yo'l oladi.


Akramjon Mamadaliev.