Farhod Nishonov: "Jahon chempionati yo'llanmasi O'zbekistonda futbolning rivojiga juda katta hissa qo'shadi"

O'yin haqida

- Bugungi o'yinga yaxshi tayyorgarlik ko'rgandik. Rossiya terma jamoasini o'rganib chiqdik. Juda kuchli terma jamoa. O'yinni yaxshi boshladik. Gol o'tkazib yuborganimizdan so'ng ham ustunlik biz tomonda edi. Qizil kartochka o'yin taqdirini hal qildi desak ham bo'ladi. 

- Birga-bir vaziyatlarda ham raqib darvozasi ishg'ol qilinmadi. Bu yosh futbolchilarning mahorati bilan bog'liqmi?

- Bu tajriba bilan bog'liq. Shunaqa o'yinlar orqali yosh futbolchilar tajribasini mustahkamlab boradi. Albatta, keyingi o'yinlarda ushbu futbolchilar raqiblar darvozasiga ketma-ket gollarni ura olishlariga ishonamiz.

- Oradan 3 kun o'tib Rossiya yoshlar terma jamoasiga qarshi ikkinchi o'rtoqlik uchrashuvini o'tkazasizlar. Bu o'yinda jamoa tarkibida rotaciyalarga qo'l urasizmi?

- Tarkibda rotaciyalarni doimiy amalga oshirib borayapmiz. Ko'p futbolchilarga imkoniyat berdik. Kimdir ilk bor terma jamoaga keldi, kimdadir turli sabablar bilan orada uzilish bo'pqolgan. O'z klubida asosiy tarkibda ko'rinishni boshlagan futbolchilarni jalb qilayapmiz. Faqat yoshlar ligasida o'ynab Rossiya kabi kuchli jamoalarga qarshi o'ynash qiyin. Buni maydonda ham ko'rdik. Ishonaman, ushbu futyuolchilar sekin-sekin o'zlarini nimalarga qodir ekanliklarini ko'rsatishadi.

- Bu intervyu saytimizda ayni BAA - O'zbekiston uchrashuvi davom etayotgan vaqtda chiqadi. Bu o'yin haqida qanday fikrlaringiz bor?

- Bugunning asosiy mavzusi albatta O'zbekiston milliy terma jamoamizning o'yini edi. Biz juda hohlaymiz, bugun jahon chempionati yo'llanmasi qo'lga kiritilishini barcha chin yurakdan istaydi. Jahon chempionati yo'llanmasi O'zbekistonda futbol sport turining rivojiga juda katta hissa qo'shadi. Buni futbolchilarning o'zlari ham his qilib turishibdi. Hozir ularga hech qanday ortiqcha motivaciya kerak emas. Masuliyatni barcha futbolchilar sezib turishibdi. Terma jamoamizga omad tilaymiz, nasib bo'lsa bugun O'zbekiston jahon chempionati yo'llanmasini qo'lga kiritadi.

Bekzod Tolibov yozib oldi