Ey iTicket! CHiptalar qaerda???

Bugun 19 iyun kuni o'tkaziladigan U-23 Osiyo kubogi final o'yiniga chiptalar sotuvga chiqarildi. Biroq bu jarayon to'liq boshlanmasdan muxlislar orasida katta noroziliklar paydo bo'la boshladi.

"Bunyodkor" stadioni kassalaridagi holat.

Ijtimoiy tarmoqlarda tarqalgan murojaatlarga ko'ra, "Bunyodkor" stadioni kassalarida faqatgina darvoza ortidagi joylar (25 ming so'mlik chiptalar) uchun chiptalar sotilmoqda. Boshqa qulayroq sektorlar uchun chiptalar kassalarda yo'q. CHiptalar sotuvi boshlanishiga uncha ko'p bo'lmagan bo'lsa ham stadion kassalarida yaxshiroq sektordagi chiptalar qolmagani iddao qilingan. Muxlislarning so'zlariga ko'ra, kassada sotilayotgan chiptalar olibsotarlar qo'lida 2-3 barobar qimmatga sotilmoqda. Bu esa bu chiptalar o'zi umuman sotuvga qo'yilganmi degan savolni paydo qiladi.

CHiptalarni onlayn xarid qilish.

Rasmiy manbalarda O'zbekiston U-23 va Saudiya Arabistoni U-23 o'rtasidagi o'yin chiptalari iTicket.uz saytida onlayn tarzda sotilishi malum qilindi. Biroq sayt kun davomida ishlamay qoldi. Bunga katta ehtimol bilan saytga bo'lgan yuklamaning oshib ketishi sabab bo'lgan. 

Yaqindagina iTicket.uz sayti qayta ishlay boshladi. Biroq hozirda sayt orqali chipta sotib olishning iloji yo'q. Saytda sotuvlar "tez orada" boshlanishi yozib qo'yilgan. Championat.asia iTicket.uz saytiga bog'lanishga harakat qilib ko'rdi. Ammo buning imkoni bo'lmadi.

Musobaqa tashkilotchilaridan rasmiy izoh kutib qolamiz.