Esingizdami? Risqullaev "Lokomotiv" foydasiga shubhali penalti qo'ygandi

PFL sayti xabar berganidek, bugun bo'lib o'tadigan O'zbekiston Kubogining 1/4 finalidan o'rin olgan "Paxtakor" - "Lokomotiv" uchrashuvini Viktor Serazetdinov boshqarishi kerak edi. Ammo o'yin startiga kam vaqt qolgan bir paytda to'satdan bosh hakam o'zgardi.

Endilikda bu uchrashuvni Ahrol Risqullaev boshqarib boradi. Oliy darajadagi o'yinlarni boshqarishni boshlaganiga hali ko'p bo'lmagan Risqullaev bu mavsum asosan Superliganing 8-turidan o'rin olgan bahsda yo'l qo'ygan xatosi bilan yodda qolgan. O'shanda u "Bunyodkor" - "Lokomotiv" bahsida hakamlik qilgandi.

Esingizda bo'lsa, o'sha uchrashuvda "Lokomotiv" mehmonda 2:1 hisobida zafar quchgan, o'yinning 86-daqiqasida "temiryo'lchilar" penaltidan to'p kiritishgandi. "Bunyodkor" darvozasi tomon penalti belgilanishi juda g'alati bo'lgandi. Mezbonlar himoyachisi Anvar G'ofurov jarima maydonchasi tashqarisida Marat Bikmaevdan to'pni uzoqlashtirgan, buning natijasida Bikmaevning yiqilishi tufayli Risqullaev ikkilanib penalti belgilagandi.

Unga qanotda yordam bergan Alisher Usmonov esa penalti bo'lgani haqida signal bermagan, chunki bayroqchasini ko'tarmagandi. Risqullaev dastlab orqaga qaytib, keyin yana yugurib kelib oxiri nuqtani ko'rsatgandi. Xullas, rosa mashmasha bo'lgandi.

PFL o'z saytida bugungi uchrashuv hakami o'zgarganini o'yin darajasi yuqoriligi bilan izohladi. Bu oldindan malum edi, chunki chorak final bitta uchrashuvdan iborat. Qolaversa, maydonda ikkita eng kuchli jamoa o'ynaydi. SHu bois PFLning nima sababdan vaqtliroq bu haqda o'ylab ko'rmagani g'alati. Umid qilamizki, bugungi bahs haqqoniy va hech qaysi tomonning etirozisiz o'tadi.