Eshitdik-da. “Neftchi” rahbari istefoga chiqdi

Farg'onaliklar ortda qolgan 10-turdan so'ng atiga 4 marta durang qayd etib, turnir jadvalida eng so'nggi pog'onani egallab turibdi. Tabiiyki ushbu ko'rsatkich mahalliy ishqibozlarni sira qoniqtirmayapti.

Bunday paytda jamoada o'zgarish bo'lishi tabiiy. Yoki rahbar yoki bosh murabbiy istefoga chiqadi. “Neftchi” o'tgan haftada o'z maydonida “Lokomotiv”ni qabul qilib, yirik (1:4) hisobida imkoniyatni boy bergach, klub rahbariyatida ishlab kelgan Mo'ysinjon Mehmonov istefoga chiqdi. Bu hozircha rasman tasdiqlangani yo'q. 

Murabbiylar shtabida esa hozircha jiddiy o'zgarishlar yo'q. Abdumalik Hakimov, Sergey Kovshov va Xislat CHilmatov faoliyatini davom ettirmoqda. Aytishlaricha murabbiy Bahrom Haydarov avvalroq jamoadan ketishni lozim topgan.

“Neftchi” klubining navbatdagi rahbari kim bo'lishi hozircha aniq emas. Eslatib o'tamiz, 10 may kuni farg'onaliklarni yana bir jiddiy raqib kutib turibdi. CHempionatning 11-turida Abdumalik Hakimov boshqaruvidagi jamoa Qo'qonga safar uyushtiradi.