Endi jadvalning quyi qismida ham kurash qizg'in kechadi

Endilikda nafaqat ikkinchi o'rin, balki oliy ligada jon saqlab qolish uchun kurash qizg'in kechadi. Ayniqsa, "Qizilqum", "Dinamo, "So'g'diyona", "SHo'rtan" va "Neftchi" klublari uchun bundan keyin har bir bahs finalga teng bo'ladi. 

O'FFning to'satdan 12ta jamoalik format bo'yicha qarorga kelgani alohida masala. Tez orada bunga ham atroflicha to'xtalamiz. Hozir esa 11-15 o'rinlarda borayotgan klublarning keyingi to'rtta o'yiniga etibor bergan holda imkoniyatlarni chamalab ko'ramiz. 

11-o'rin. "Qizilqum". 30 ochko
Hozircha "Qizilqum" "xavfli zona"da emas, lekin jamoa ketma-ket o'yinlarni yutqazishda davom etaversa, oliy liga bilan xayrlashib qolishi mumkin. Qolaversa, bu jamoa ikkinchi davrada o'zini ko'rsata olmayapti. "Qizilqum" qolgan to'rtta bahsdan ikkitasini uyda, yana ikkitasini safarda o'tkazadi. Jamoaning ayniqsa "Dinamo"ga qarshi bahsi muhim ahamiyat kasb etadi. 

Jamoaning keyingi uchrashuvlari: 
27-tur. "Qizilqum" - "Dinamo"
28-tur. "Mashal" - "Qizilqum"
29-tur. "Qizilqum" - "Metallurg"
30-tur. "SHo'rtan" - "Qizilqum"

12-o'rin. "Dinamo". 29 ochko
"Dinamo"ni 11-o'rindagi "Qizilqum"dan atigi bir ochko ajratib turibdi. Demak, navbatdagi turda navoiylik muxlislar juda ajoyib bellashuv guvohiga aylansalar kerak. SHuningdek, bu o'yinga Samarqanddan ham muxlislar borishi mumkin. "Dinamo" uchun keyingi turdagi "Neftchi" bilan bahs ham etiborga molik o'yinlardan biri bo'ladi. 

Jamoaning keyingi uchrashuvlari: 
27-tur. "Qizilqum" - "Dinamo"
28-tur. "Dinamo" - "Neftchi"
29-tur. "Dinamo" - "Lokomotiv"
30-tur. "Mashal" - "Dinamo"

13-o'rin. "So'g'diyona". 28 ochko
Albatta, "So'g'diyona"ga ham qiyin, lekin jamoa 11-o'rindagi "Qizilqum"dan atigi ikki ochko ortda bormoqda. Demak, hali hech narsa yo'qotilgani yo'q. Bundan keyin jizzaxliklar uchun ham har bir bahs finaldek o'tadi. Ularning birinchi finali shu turda "Paxtakor"ga qarshi kechadi. 

Jamoaning keyingi uchrashuvlari: 
27-tur. "So'g'diyona" - "Paxtakor"
28-tur. "Navbahor" - "So'g'diyona"
29-tur. "So'g'diyona" - "Qo'qon-1912"
30-tur. "Buxoro" - "So'g'diyona"

14-o'rin. "SHo'rtan". 23 ochko
"SHo'rtan"da uch ochko bor, chunki jamoaga "Obod" bilan o'tkazilmaydigan o'yin uchun texnik g'alaba yoziladi. Lekin baribir qolgan o'yinlarda g'uzorliklarga qiyin bo'ladi. Balki O'FF bu klubni legionerlarga vaqtida maosh to'lamagani uchun FIFA qaroriga binoan birinchi ligaga tushirib yuborishi mumkin. Hammasini vaqt ko'rsatadi. 

Jamoaning keyingi uchrashuvlari: 
27-tur. "Olmaliq" - "SHo'rtan"
28-tur. "SHo'rtan" - "Nasaf"
29-tur. "Obod" - "SHo'rtan"
30-tur. "SHo'rtan" - "Qizilqum"

15-o'rin. "Neftchi". 23 ochko
"Neftchi" ham "SHo'rtan" bilan bir xil ochko to'plagan. Farg'onaliklar uchun bu mavsum juda og'ir o'tmoqda va mavsum oxiriga kelib nima bo'lishini aytish qiyin. "Neftchi" bu turda dastlab "Lokomotiv" sinovidan o'tadi. SHuningdek, bu jamoaning safarda "Dinamo" bilan kechadigan bahsi ham muhim rol o'ynaydi. 

Jamoaning keyingi uchrashuvlari: 
27-tur. "Neftchi" - "Lokomotiv"
28-tur. "Dinamo" - "Neftchi"
29-tur. "Neftchi" - "Mashal"
30-tur. "Metallurg" - "Neftchi"

X.Xoliqov.