Eldor Moyliev: "Qiynalib to'p kiritamiz, keyin esa oddiy gol o'tkazamiz"

- O'yin haqida fikringiz?

- Tomoshabop o'yin bo'ldi. Ikkala jamoa ham g'alaba uchun maydonga tushgandi. Muxlislarimizga oxirigacha qo'llab turishgani uchun rahmat aytaman. Futbolchilarga ham rahmat, hamma borini berib o'ynadi. O'z xatolarimiz tufayli oddiy gollarni o'tkazib yubordik. Qiynalib to'p kiritamiz, keyin esa oddiy gol o'tkazamiz. Ko'plab vaziyatlar yaratdik, afsuski g'alaba qozona olmadik.

- O'tkazib yuborilgan uchinchi golda darvzabon oldinga chiqib ketdi va xatoga yo'l qo'ydi.

- O'sha vaziyatda darvozabonimiz oldinga chiqmasa ham bo'lardi, chunki himoyachi bor edi. Lekin o'ziga ishonch bilan chiqdi, ammo kichik epizodda xatoga yo'l qo'ydi. Odatda himoyachilar to'p uchun kurash olib borayotgan paytda darvozabonlar chiqmaydi, qolaversa darvozagacha hali masofa uzoq edi. Biz esa raqibga gol sovg'a qildik. 

- Temur Mamasiddiqov bilan Nuriddin Hasanov almashtirilish sababi nimada?

- Temur to'p bilan yaxshi, lekin himoyada ozroq bo'sh o'ynaydi. Biz hisobda oldinda borayotgandik, shuning uchun uni himoyaga yaxshi qo'shiladigan futbolchiga almashtirdik. Nuriddin Hasanov esa mikro jarohat sabab o'ynay olmasligini aytdi, shu bois almashtirdik.

- Kuchli jamoalarga qarshi "Sho'rtan"ning o'yinini qanday izohlaysiz?

- O'tgan tur "Nasaf" bilan ham yaxshi boshlagandik. Gap natijada emas, balki o'zimizga bo'lgan ishonchda. "Nasaf"dan uchralgan mag'lubiyatdan so'ng yigitlar bilan ko'proq ruhiy tomonlama ishladik. Bizda hammaga kurash taklif eta oladigan jamoa bor, faqat futbolchilar o'z kuchlariga ishonishlari kerak. O'z kuchimizga ishonsak hamma bilan tengma-teng o'ynay olamiz.

- "Sho'rtan" bugun g'alabadan quruq qolishining sababi yuzaga kelgan xatolar tufaylimi?

- Endi ko'p narsa o'zimiz yo'l qo'ygan xatolar bilan bog'liq. Etibor bering, oddiy gollarni o'tkazib yuboryapmiz. Gol urishga kelganda juda qiynalyapmiz. Xursand qilayotgan tomoni, birinchi davradagi o'yinimizga nisbatan hozir ko'proq xavfli vaziyat yaratyapmiz. Faqat vaziyatlardan foydalana olsak bo'ldi.

- Sardor Sadullaev Jo'rabek Mannonov o'rnini to'ldira oldimi?

- Sardor yaxshi futbolchi. U "Nasaf" bilan ham yaxshi o'ynagandi. Bugungi uchrashuvda faqat bir marta xatoga yo'l qo'ydi. U birga bir vaziyatlarda to'pni raqibdan olib qo'ydi. Himoyachi sifatida o'z ishini yaxshi bajardi.