Ekspert fikri. Sanjar Asqaraliev: "Navbahor" Viktor Jalilovni mavsum boshida tayinlashi yoki No'mon Hasanovga vaqt berishi kerak edi

Yangi mavsumga jamoani tayyorlagan No'mon Hasanov istefoga chiqarildi va uning o'rniga Viktor Jalilov bosh murabbiy etib tayinlandi. Birinchi turdan keyinoq murabbiyning ishdan olinishi ko'pchilik qatori bizni ham taajjubga soldi. Ushbu holatga nima sabab bo'lgani aniq emas. Biz esa vaziyatga baho berish maqsadida ekspert fikriga yuzlandik. Bunda o'z vaqtida "Navbahor", "Neftchi"dagi o'yinlari bilan tanilgan sobiq futbolchi Sanjar Asqaraliev mazkur jarayonlarga o'z munosabatini bildirib o'tdi. 

"Birinchi turdanoq murabbiy o'zgarishi chempionatimizda kam kuzatiladigan holat hisoblanadi, bunaqasi deyarli yuz bermaydi. SHaxsiy fikrimcha, murabbiy o'zgarishini mavsum oldidan amalga oshirish yoki No'mon Hasanovga biroz vaqt berish kerak edi. 

Viktor Jalilovni oldinda qiyin ishlar kutmoqda. Birinchidan, jamoani Viktor Romanovich shakllantirmagan, futbolchilarni u kishi tanlamagan. SHu bois birdaniga katta o'zgarishlarga qo'l ura olmaydi. Ikkinchidan, murabbiy bor futbolchilar bilan oldindagi o'yinlarga tayyorgarlik ko'rishga majbur. Bu natija beradimi-yo'qmi buni vaqt ko'rsatadi. Eshitishimga qaraganda, serbiyalik futbolchilar ham jamoani tark etish arafasida. Ushbu mutaxassisdan ko'p narsa o'rganish mumkin. Yana qaytaraman, oldindagi bahslarda katta o'zgarishlar bo'lmaydi. 

Viktor Romanovich birinchi davrani qo'l ostidagi futbolchilar bilan o'tkazib, yozgi transferlar oynasi vaqtida o'zi istagan o'yinchilarni jalb qilishi mumkin. Murabbiylik postini mavsum avvalida yoki joriy mavsum yakunlangach berish kerak edi, deb o'ylayman. 

Ko'pchilik katta natijalar, o'sha chempionlikni kutayotgani tabiiy. To'g'ri, hozirgi futbol umuman boshqacha. Lekin murabbiy shu futbolni ichida yurdi, chetga chiqib ketgani yo'q. Vaqt o'tgani sari baribir jamoada o'zgarishlar qiladi", - deydi Sanjar Asqaraliev.