Edgar Gess: "9 nafar futbolchi bilan 11 nafar futbolchiga qarshi o'ynash og'ir"

"Bugungi o'yinda shogirdlarimning harakatlaridan qoniqdim, ularning xarakteridan xursandman. Lekin biz uchrashuvda 11ga 11 o'ynashni istagandik. Bahs boshida qizil kartochka va penalti... Biz himoyalanishga majbur bo'lib qoldik. 9ta bo'lib qolish esa juda qiyin. Natijadan qoniqmadim.

Hakamlar qizil kartochka ko'rsatishadi, penalti belgilashadi. Bu ularning ishi. Biz esa o'z ishimizni qilishimiz kerak.

Agar himoyachilar xato qilishmasa barcha o'yin 0:0 hisobida tugardi. Futbol xatolarsiz bo'lmaydi.

Jamoa rahbariyati bizning oldimizga kuchli va raqobatbardosh jamoa tuzish vazifasini qo'ygandi. Bundan tashqari mavsumda 30 ochko olishimiz kerak. Menimcha bunga kuchimiz etadi.

Biz ikkinchi bo'limda ikki kishi kam bo'lib qolib ham imkoniyatlarga ega bo'ldik. Aynan mana shu meni xursand qildi.

11 avgust kuni "Paxtakor-79"ga 35 yil to'ladi. O'sha futbolchilarni yaxshi tanir edim. Afsuski ko'pchiligi yosh ketishgandi. O'sha yil may oyida meni "Paxtakor"ga chaqirishgandi. O'shanda agar taklifga rozi bo'lganimda bu erda bo'lmasmidim. Bu taqdir, bu hayot, - deydi Edgar Gess.

SHerzod Hamdamov yozib oldi.