Diyor Imomxo'jaev: "Hakamlar mehnat qilishyapti. Ular avvalgi hakamlardan yaxshiroq va to'g'riroq ishlashyapti"

"Kuchli issiq haqida ketma-ket ogohlantirish bo'layotgan vaqtda futbol tanaffusga chiqdi. Ko'z tegmasin, intriga bor, ishlayotganlarda xatolar ham bo'ladi. Coca-Cola Superliga uchrashuvlaridagi hakamlik bo'yicha faqatgina to'rt uchrashuv uchun menda savollar paydo bo'ldi:

2-tur

So'g'diyona — Turon

4-tur

Paxtakor — Metallurg

5-tur

Mashal — Qo'qon-1912

12-tur

Nasaf — So'g'diyona.

5-turdagi uchrashuvda kiritilgan gol bo'yicha qanot hakamiga savolim ko'p emas, VAR yo'q edi, holat shuni taqozo qildi. Bunaqasi futbolda bo'lib turishi, germaniyalik mashhur referi Feliks Brix bir necha yil avval Bundesligada qasddan bo'lmagan shunday xato qilgani, oradan 4 yil o'tib, shu hakam CHempionlar Ligasi finalini boshqargani haqida yozgandim.

SHunda faqatgina uch uchrashuv qolyapti. Ikkitasida "So'g'diyona" nomi bor. Birinchisi uchun O'FA o'z xulosasini taqdim etgandi. Ikkinchisida ham shunday bo'ladi, unga qadar kutish kerak. 

12 ta tur uchun bu yaxshi ko'rsatkich. CHunki hakamlar butkul xatosiz ishlashining iloji yo'q. SHu yilning 27 mart kuni niderlandiyalik referi Serbiya — Portugaliya o'yinida Krishtianuning 100 foizlik golini inobatga olmadi, hatto o'sha Evropada ham xatolar bor. 

Hakamlar mehnat qilishyapti. Ular avvalgi hakamlardan yaxshiroq va to'g'riroq ishlashyapti. SHunchaki avvalgilar insofni shu qadar yutib yuborishgani kasriga, bugungilar javob berishyapti, ularga nisbatan muxlislarda toqatsizlik bor.  SHunchaki avvallari har bir o'yin namoyish etilmasdi, bugun bizda bu bor va tabiiyki, savollar ham, etirozlar ham ko'paygan, bu normal holat. Yaqinda ham VAR yo'q edi, endi u bor va mavzu ham ko'p bo'lishi turgan gap. Ko'zingizni kattaroq oching va VAR faqat bizda emas, butun dunyoda shunday mavzu ekanini ko'ring. 

12 turga ikki muammoli o'yin, ishoning, normal holat. Biz futbolni tashqaridan ko'rayotgan davrlarda hakamlar qanday bo'lganini, kameralar yo'q vaqtda nimalar qilganini eslang, katta yoshli akalarimiz, otalarimiz o'sha o'yinlarni juda yaxshi eslashadi. SHunday ishlaganlarning ayrimlari bugun inspektorlik qiladi, afsuski, u davrlarni qayta jonlantirishning imkoni yo'q. Bugun esa har bir xato mavzu bo'ladi, har biriga O'FA munosabat beradi. PFL yoki futbol tepasiga umidli kimdir kelsa, bu hammasi birdaniga zo'r bo'ladi degani emas. Nohaqliklarga, adolatsizliklarga qarshi yillab kurashiladi, qattiq mehnat qilinadi. Bugun bizdan nimalar o'tayotgani o'zimizga malum. 

Biz o'ta chuqurlikda emasmiz, biz shunchaki hammasi yanada yaxshini bo'lishini oldingi davrlardan ko'ra ko'proq talab qilyapmiz", – deb yozadi Diyor Imomxo'jaev telegramdagi sahifasida.