Dilshod Nuraliev: “Mustaqil ravishda ishlashni istaganim uchun yoshlar terma jamoasiga o'tdim”

Yoshlar bilan ishlash xadisini olgan murabbiy eng ishmarib ishga kirishish arafasida. Biz esa Nuraliev bilan suhbatlashib, ayrim savollarga javob oldik.

- Dilshod aka, yaqinda OTJda murabbiylar shtabi o'zgardi. Bungacha sizni ushbu jamoada ko'rayotgan edik. Endilikda nima bilan mashg'ulsiz?
- Takidlab o'tganingizdek, OTJda yangi murabbiylar guruhi faoliyat boshladi. Men esa mustaqil ravishda ishlashni istaganim uchun yangi tashkil topayotgan O'zbekiston U-13 yoshlar terma jamoasini boshqarishni lozim topdim.  

- Siz tilga olib o'tgan yoshlar terma jamoasining ilk yig'ini taniqli mutaxassis Ahmadjon Musaev boshchiligida o'tgandi...
- Bilasizmi bu terma jamoa endi-endi tuzilmoqda. Menimcha terma jamoalar markazi tomonidan yaqin kunlarda rasman tasdiqlansa kerak.

- Bosh murabbiy kim bo'ladi?
- Javobgarlikni o'z bo'ynimga oldim. Endi-endi ishga kirishamiz. Darvoqe, shuni ham aytib o'tishni istardimki, 2000 yilda tavallud topgan futbolchilardan iborat bo'lgan U-15 yoshlar terma jamoamizni bugungi kunda Temur Olimxo'jaev boshqarmoqda. Murabbiylar shtabida ushbu mutaxassisga ham yordam berib boradigan bo'ldim.

- U-13 yoshlar terma jamoasida yordamchilaringiz kimlardan iborat bo'ladi?
- Bu haqda hozircha o'ylab ko'rganim yo'q. Yaqin orada bunga oydinlik kiritilsa kerak.

- Boshqaruvingizdagi terma jamoaning yaqin oradagi rejalari qanday?
- Buni terma jamoa markazi aniqlaydi. Katta extimol bilan yig'inlar yanvar va fevral oylaridan boshlansa kerak.  

Islombek Rustambekov suhbatlashdi.