“Dalmatinko cup”. Kichik "qaldirg'ochlar" Xorvatiyadagi turnirni qanday yakunladi?

“Bunyodkor”ning uchta yosh toifasidagi jamoalari ishtirok etgan musobaqa klub tarbiyalanuvchilari katta maktab vazifasini o'tab berdi, deyish mumkin. Zero, Xorvatiya va Evropaning boshqa nomdor klublari akademiyasi tarbiyalanuvchilariga qarshi maydonga tushgan “qaldirg'ochlar” evropalik tengqurlaridan hech bir jabhada ortda emasligini ko'rsata oldi. "Bunyodkor"ning uchta jamoasi ham guruh bosqichidan pley-offga yo'l olgani so'zimizga isbot bo'ladi. Garchi klubning ikki jamoasi chorak finalda kurashni to'xtatgan bo'lsa-da, o'yinda mag'lub bo'lgani yo'q. Miraziz Mirzaahmedov murabbiyligidagi “Bunyodkor-2008” mahalliy “Primorac”ga qarshi bahsda ikki bor hisobda oldinga chiqib oldi. Mezbonlar ikki marta vakillarimizni quvib etishga majbur bo'lishdi. Penaltilar seriyasida omad maydon egalariga kulib boqdi. Penaltilar seriyasi lotoreya ekanligi futbol jamoatchiligiga sir emas.

Kecha klubning yana bir jamoasi chorak finalda kurashni to'xtatganidan xabaringiz bor. Alisher Ibrohimov boshchiligidagi “Bunyodkor-2009” Xorvatiyaning o'sha mashhur “Dinamo Zagreb” jamoasi tarbiyalanuvchilariga qarshi saf tortdi. Uchrashuvda hisob ochilmadi. Aytish kerakki, Alisher Ibrohimov shogirdlari nomdor raqib safidagi tengdoshlaridan o'yin borasida ustun bo'lsa bo'ldiki, kuchsiz ko'ringani yo'q. SHunchaki, bu bahsda ham lotoreya o'yin taqdirini hal qildi. Penaltilar seriyasida ham kurash keskin kechganini hisobdan bilish mumkin – 8:7.

CHorak finalga qadar o'z darvozasidan to'p olib chiqmagan G'ulom Halimtoev ustozligidagi “Bunyodkor-2011”ning “Dalmatinko cup”dagi ishtirokini faqat olqishlash mumkin. Finalgacha etib kelgan yosh “qaldirg'ochlar” hal qiluvchi bahsda yirik hisobda yutqazgan bo'lsa-da, bu tarbiyalanuvchilarning kuchsizligidan emas, balki bir kunda yuqori bosimda uchta o'yin o'tkazish og'irlik qilgani bilan bog'liq. Ham ruhiy ham jismoniy charchoq finalda pand berdi. 

Umumiy manoda “qaldirg'ochlar”ning “Dalmatinko cup”dagi ishtirokini har tomonlama ijobiy baholay olamiz. Bolalar futboli har tomonlama rivojlangan Xorvatiya maydonlarida “yo'qolib” qolmagan klub tarbiyalanuvchilari “Bunyodkor” kelajagi ishonchli qo'llarda ekanligidan darak beradi!