“Cementchi”ga yangi futbolchilar kelib qo'shilishda davom etmoqda

Jamoamizni mavsum avvalidan tark etgan futbolchilardan Jamshid Qobulov va Bahodir Qodirovlar “Neftchi”ning yoshlar jamoasiga, Azim Samijonov “Roshidon” jamoasiga, Sardor Suyunov “Istiqlol” jamoasiga borib qo'shilgan bo'lsalar, jamoaning eng yaxshi yarim ximoyachilaridan biri bo'lgan Sunnatillo Ermatov Oliy liga vakili “Obod” jamoasi bilan uch yillik shartnoma imzoladi. Jamoamizning yana bir yosh yarim ximoyachisi Abdulla Abdullaev Evropa futbol akademiyalaridan birida o'zini sinab ko'rish maqsadida jamoani tark etdi.  Murabbiylarimiz ketgan futbolchilarni o'rnini qoplash va barcha chiziqlarini kuchaytirish maqsadida jamoani tajribali va kuchli futbolchilar bilan to'ldirishda davom etmoqda.  Yig'inning dastlabki kunidayoq jamoamizga Quvasoylik muxlislar uchun qadrli bo'lgan “Qizilqum” jamoasidan hujumchi Elyor Akbarov va “Obod” jamoasidan “Cementchi” uchun begona bo'lmagan tezkor yarim ximoyachi Umidjon Matmusaevlar kelib qo'shilgan bo'lsa, yig'in davomida mashg'ulotlarga “Olmaliq” jamoasidan himoyachi Amirxon Ibragimov, “Uzdongju” jamoasidan tajribali himoyachi Asror Rahmonov, yarim himoyachi Fehruz Saloxidinov va hujumchi Islom Karimovlar kelib qo'shilishdi.

Kecha Farg'onada o'tkazilgan “Cementchi-2”ga qarshi o'rtoqlik uchrashuvida jamoaga yangi qo'shilgan ushbu futbolchilarning barchasi maydonga tushirildi. Aytish mumkinki, ushbu futbolchilar ko'pchilikda iliq tassurot qoldirishdi.
Murabbiylar ushbu futbolchilardan tashqari 1998 yilda tavallud topgan yana bir nechta yoshlarni ham nazoratdan o'tkazmoqda.

“Cementchi” jamoasi matbuot kotibi Zuhriddin Abdullajonov