“Cementchi” tayyorgarlikni yanvardan boshlamoqchi

Jamoaning bu yilgi ishtirokidan rahbariyat va murabbiylar shtabining ko'ngli to'lgan. Endi dekabr oyining ikkinchi yarmida klub uchun mavsum yakuniga bag'ishlab va yangi yil bayrami munosabati bilan ziyofat dasturxoni yoziladi.

Aytishlaricha quvasoyliklar kelasi mavsumga yanvar oyidan tayyorgarlikni boshlaydi. Hozircha jamoa kuchlilar safiga chiqishga shoshilayotgani yo'q. Eng avvalo murabbiylar shtabi mustahkam poydevor qo'yishni rejalashtirgan. So'ngra yakdil jamoa tuzib, elita yo'llanmasi uchun kurashish niyatida.

Tarkibdagi o'zgarishlar hozircha yuz bergani yo'q. Faqatgina viloyatning bosh jamoasi “Neftchi”dan ijara asosida olingan Alisher Fayzullaev, Nodirxon Kamolov va Jahongir Dadaboev singari o'yinchilar yana o'z klubiga qaytadi. Qolgan futbolchilar xususida hozircha tayinli gap aytish qiyin. Hammasiga yig'in boshlangach oydinlik kiritib boriladi. Darvoqe, “Cementchi” har yili o'tkazib kelinadigan ananaviy turnir – Hokim Kubogida ishtirok etishni o'z rejasiga kiritgan. SHuningdek Toshkentda o'tkaziladigan PFL Kubogida ham qatnashishi kutilmoqda.