“Bunyodkor” – “Paxtakor”. Videoprevyu

Bungacha kubok doirasida Toshkentning ikki grand klubi bir-birlari bilan olti marotaba ro'baro' kelishgan. O'zaro o'yinlarda “Bunyodkor” hisobida uchta g'alaba bor “Paxtakor” esa ikkita o'yinda g'olib chiqqan. Bitta bahsda kuchlar teng kelgan. To'plar farqi – 10:6, “qaldirg'ochlar” foydasiga.

“Bunyodkor” va “Paxtakor” jamoalari kubok doirasida birinchi bor 2007 yili finalda kuch sinashishgan. O'zbek futboli tarixida “loy jangi” nomi bilan esda qolgan ushbu bahsda penaltilar seriyasida “paxtakorchilar” g'alaba qozonishgandi. Oradan bir yil o'tib, “Paxtakor” va “Bunyodkor” yana kubok finalida uchrashishdi. Bu safar “qaldirg'ochlar” 3:1 hisobida g'olib chiqishdi. 2009 yilda ham hal qiluvchi final bu ikki jamoa o'rtasi o'tdi. Ketma-ket uchinchi finalda “sherlar” 1:0 hisobida ustun kelishdi. SHundan keyin 2012 yilgi kubok bahslarining yarim finali yana princpial raqiblarni uchrashtirdi. “Jar”dagi bahsda 1:1 hisobi qayd etilgan bo'lsa, “Paxtakor” maydonida kechgan javob uchrashuvida “Bunyodkor” g'alaba qozona oldi – 3:1. Joriy yilgi mamlakat kubogi yarim finalida ham muxlislar “qaldirg'ochlar va “sherlar” qarama-qarshiligiga guvoh bo'lishmoqda. “Paxtakor” stadionida o'tgan birinchi o'yinda Sergey Lushchan shogirdlari 3:2 hisobida g'olib chiqishdi.

“Bunyodkor” mezbonligidagi o'tadigan javob bahsi 16 sentyabr, chorshanba kuni “Bunyodkor” stadionida soat 18:00da boshlanadi. Uchrashuvni Viktor Serazetdinov boshchiligidagi poytaxtlik hakamlar guruhi boshqarib borishadi.

Uchrashuvni “Paxtakor” himoyachisi Davron Xoshimov diskvalifikaciya tufayli o'tkazib yuboradi.

Quyidagi havolalarda “Bunyodkor” va “Paxtakor” jamoalarining kubok doirasidagi o'zaro o'yinlarida kiritilgan gollarni tomosha qilishingiz mumkin. Videoprevyu